Podas de árbores en Iglesias Vilarelle

56

A Concellaría de Parques e Xardíns iniciou esta semana traballos de poda de saneamento nos chopos da rúa Iglesias Vilarelle e do parque de Campolongo. A concelleira Anxos Riveiro visitou esta mañá os traballos que consisten no rebaixe das copas, eliminación de polas secas… que redundan na mellora da calidade de vida das árbores. Tamén está previsto a poda dos sauces do parque.

Paralelamente, Parques e Xardíns tamén está a facer diversas talas de chopos na mesma rúa, dende o edificio de Estatística do Estado cara Alcalde Hevia, porque se atopan nun estado perigoso de caída dado que están enfermas ou descalzadas. Todas as talas forman parte dun estudo previo dos técnicos municipais no que se recolle a saúde destas árbores e a necesidade de cortalas.

Unha vez que rematen estes traballos de saneamento, o departamento procederá a replantación de novas especies, nalgúns casos no mesmo lugar ou próximo a onde se atopaban as árbores, e noutros casos noutros lugares máis apropiados dentro do parque de Campolongo.