O alcalde participa hoxe nunha conferencia internacional sobre boas prácticas ambientais urbanas en Guimarães, unha cidade preto de Braga que aspira a converterse en Capital Verde Europea e que ten unha longa relación con Pontevedra, a onde acudiron en varias ocasións para estudar o modelo urbano.
Xunto a Miguel Anxo Fernández Lores participan tamén representantes de Vitoria e Estocolmo (que falarán da súa experiencia como capitais verdes), así como técnicos das Universidades de África do Sul e do Minho. As sesións inclúen tamén unha visita a un centro local de investigación para a revalorización de residuos.
Lores falará do proceso pontevedrés, comezando pola reforma urbana, centrándose nas políticas de mobilidade, o resto das políticas, e rematará falando dos resultados que obtivo Pontevedra durante a súa transformación, tanto ambientais, como de seguridade, autoestima, revitalización urbana, actividade comercial ou mobilidade infantil. Os numerosos premios recibidos por este modelo sustentabel servirán como remate da súa intervención.