O CEIP A Carballeira de Lourizán terá comedor escolar o próximo curso

49

O CEIP A Carballeira de Lourizán disporá, a partir do próximo curso 2016-17, de servizo de comedor. Da así un novo paso cara a facilitar a conciliación da vida familiar e laboral das nais e pais do alumnado do centro. Un camiño que comezou no actual curso coa incorporación do Plan Madruga.

O servizo de comedor do colexio da Carballeira estará a cargo da empresa Serunion e estará xestionado pola FANPA-Pontevedra nos mesmos termos que o resto da rede de comedores escolares dos centros educativos públicos do municipio. A incorporación do servizo é unha demanda da propia comunidade educativa, avalada cunha enquisa feita pola ANPA do centro.

A experiencia amosa que o servizo de comedor escolar non só fai máis doada a conciliación familiar-laboral se non que axuda a fortalecer e mesmo incrementar a matrícula do centro, según explica o presidente da FANPA, Roxelio Carballo, poñendo como exemplo o CEIP de Campañó, que este ano oferta por vez primeira o servizo de comedor e con esta expectativa incrementou un 30% a súa matrícula.

Dos 21 centros educativos públicos que hai na cidade, hoxe son 16 os que teñen servizo de comedor e pasarán a ser 17 no mes de setembro.