O Concello de Pontevedra continúa coas pavimentacións en distintos puntos da cidade aproveitando o bo tempo. Hoxe trasladáronse ao ámbito da rúa Campo do Boi, que se vén a sumar a outras realizadas no barrio de Monte Porreiro, na avenida de Bos Aires ou no parque das Camelias, na Parda, previamente.
As rehabilitacións integrais do firme comezaron pola rúa Campo do Boi e continuarán por Pilar Bértola, Ouro, e Xofre de Tenorio no primeiro tramo (dende a avenida de Bos Aires).
O custe destas actuacións é de 49.897,66 euros.
Mentres continúase traballando na senda do Lérez, onde o Concello está a ampliar a zona de tránsito peonil e ciclista até a pasarela de madeira da avenida de Bos Aires na que arranca a senda do Lérez. Estes traballos enmárcanse dentro da mellora que se realizou nestes últimos meses no paseo do río até a praia fluvial.
Aproveitando os sobrantes próximos á ponte de Monte Porreiro, estase a continuar a senda peonil e ciclista, ampliando a beirarrúa até chegar á pasarela de madeira. Esta está na actualidade pechada ao tránsito peonil porque se atopa afundida e en mal estado, pero está prevista a súa reposición con estes traballos.