Nace Pontevédrate en Familia

O término “Pontevédrate” ven sendo utilizado polo Concello de Pontevedra en todos os temas referidos ao turismo como unha maneira de sentir e vivir a nosa cidade. Por iso consideramos que é unha boa idea “invitar” a todos e a todas, coñecedores ou non da cidade, a que a descubran e a gocen en familia.

Nace Pontevédrate en familia, a proposta da Concellería de Promoción da Cidade para que os nenos e nenas de fóra e de aquí descubran e gocen da cidade con xogos, roteiros e a posibilidade de ocupar as rúas e prazas sen perigo.

Unha das respostas máis común nas enquisas de satisfacción turística da xente que visita Pontevedra é que “sentímonos como na casa”, explica a concelleira de Promoción da Cidade, Anabel Gulías. Agora o Concello vai un paso máis alá e aprovéitase de que somos “a cidade dos nenos e nenas” para por en marcha “Pontevédrete en Familia”, un produto turístico atractivo para os máis pequenos, entretido para os maiores e deseñado e feito por pontevedreses.

Actividades de Turismo familiar

• XINCANA. A procura do tesouro

A xincana para nenos e nenas é un produto turístico do Concello de Pontevedra que consta de oito vídeos de animación en oito puntos de interese turístico e cultural da cidade de Pontevedra.

A xincana é unha especie de procura do tesouro para nenos e nenas onde catro personaxes moi especiais – Uxía, Brais, a cadela Ponte e o pirata Benito- lles plantexarán aos cativos e os seus pais un xogo por etapas divertido e ameno onde poderan coñecer a cidade de Pontevedra dunha forma diferente.