- Esta terceira edición inclúe como novidade unha categoría para familias, na que
competirán rapaces de 6 a 13 anos acompañados dun adulto - As fotografías terán como temática común á lingua galega
Un ano máis volve a Pontevedra a súa cita coa fotografía da man do Maratón Fotográfico,
que celebrará mañá sábado a súa terceira edición, baixo o título “Saca a Lingua”. A saída
será ás 10.00 horas dende a Casa da Luz e contará coa participación de máis de 50
fotógrafos -amateurs e profesionais- que terán que que fotografar tres temáticas que se
desvelarán mañá e que, nesta ocasión, estarán vencelladas á lingua galega.
Como novidade, incorporase a categoría familia, onde participarán nenas/os de entre 6 e
13 anos (ambos inclusive) acompañados por un adulto.
Todos os participantes deberán facer entrega dunha fotografía por cada unha das
temáticas para poder optar a cada un dos premios que serán outorgados. Coma nas
anteriores edicións, un xurado formado por profesionais da imaxe, da arte e a cultura será
o encargado de decidir catro das cinco categorías de premios: mellor fotografía do
maratón e os gañadores de cada unha das temáticas propostas.
O quinto premio será outorgado polo público que poderá votar pola súa imaxe favorita na
Casa da Luz durante a exposición que terá lugar do 5 ao 16 de xuño.
Respondendo ao mesmo obxectivo de dinamización e de coñecemento da cidade do que
parte o evento, os premios concedidos consistirán en diversas experiencias en varios
establecementos de Pontevedra.