México coñecerá polo miúdo un modelo urbano que xera un modelo de convivencia exemplar

35
  • O secretario técnico da Comisión de Desenvolvemento Urbano do Senado de México concreta co alcalde Miguel Fernández Lores e a concelleira Anabel Gulías a axenda institucional da viaxe ao país
  • México debate o camiño a seguir no seu tránsito a cidades máis humanas e convida ao alcalde a expoñer o modelo Pontevedra na Cámara

Avanzan os preparativos da viaxe a Mèxico. O alcalde Miguel Fernández Lores e a concelleira de Promoción da Cidade, Anabel Gulías, recibiron e mantiveron unha reunión de traballo co secretario técnico da Comisión de Desenvolvemento Urbano e Ordenación Territorial do Senado de México, Fernando Cota Acuña, que aproveita a súa estancia privada en Pontevedra para concretar distintos aspectos da axenda institucional que manterá a delegación municipal no país azteca.

O convite do ITAM (Instituto Tecnolóxico Autónomo de México) ao alcalde para que falase nesta prestixiosa universidade do modelo urbano, abriu as portas á organización da primeira misión comercial a México no escenario da Expopymes de Cidade de México e derivou nun novo convite, do Senado de México, interesado en profundar no modelo de Pontevedra nun momento no que en México se está a debater e definir o camiño a seguir no desenvolvemento urbano do país.

México leva anos avaliando modelos de cidade na procura do seu propio camiño e dende o Senado púxose o foco sobre Pontevedra “un modelo de cidade que xera un modelo de convivencia exemplar” en palabras de Fernando Cota. Dáse a circunstancia de que, por razóns familiares, o secretario técnico da Comisión de Desenvolvemento Urbano, viaxa periodicamente a Pontevedra e ademais o pasado ano o presidente da Comisión de Desenvolvemento Urbano do Senado de México coñeceu a cidade como turista o que lles fai ter unha idea axustada sobre o modelo pontevedrés.

México aprobou o pasado ano a Lei urbana de asentamentos humanos e agardan ter para o próximo a nova Lei xeral de mobilidade coas que pretenden regulamentar o desenvolvemento urbano do país. “Estamos construíndo os instrumentos para que México transite a un sistema de cidade máis compactas, máis peonís, máis humanas, con máis vida de barrio, cunha economía a escala local”. “ O caso de Pontevedra venos como anel ao dedo” engadiu Fernando Cota.

Rematada a xuntanza no Concello de Pontevedra, o secretario técnico da Comisión de Desenvolvemento Urbano e Ordenación Territorial do Senado de México achegouse á Deputación Provincial onde foi recibido pola presidenta provincial, Carmela Silva e o vicepresidente e concelleiro de Infraestruturas, César Mosquera.