- O Ganapán, o espazo infantil da praza, programa para mañá unha visita de alumnos do CEIP Cabanas. Para o xoves do Vidal Portela e para o venres, de Campañó.
- Este sábado retómase a actividade habitual do “Ganapán Gourmet” para nenos. A temática desta ocasión será a zumeterapia.
Unha vez rematadas as obras de acondicionamento do primeiro andar do Mercado de Abastos, a Concellaría de Promoción da Cidade retoma a actividade do Ganapán, o espazo infantil da praza, que nesta mesma semana xa recibirá visitas de escolares de Pontevedra, e na fin de semana volve a programar “Ganapán Gourmet” coa temática zumeterapia.
Para mañá mesmo, 23 de abril, está prevista a visita de escolares do CEIP Cabanas ao Mercado, en dúas sesións: de 10.00 a 11.30 horas, e de 12.00 a 13.30 horas.
O xoves serán os rapaces do CEIP Vidal Portela os que visitarán o Mercado de Abastos e o Ganapán en horario de 12.00 a 13.30 horas.
Esta semana as visitas concluirán cos escolares do CEIP de Campañó. Será o venres, 25 de abril, de 10.00 a 11.00 horas.
Ademais das sesións concertadas cos centros de ensino, o Ganapán retoma as sesións dos sábados pola mañá na súa programación “Ganapán Gourmet”, obradoiros de gastronomía, natureza, literatura e arte.
A temática deste sábado, 26 de abril, será a zumeterapia. En seguintes semanas abordarase “cociña de primavera”, actividades en relación ás Letras Galegas ao longo do mes de maio, e tamén haberá colaboracións con distintas entidades locais como “Semente” ou “A Devesa”.