Comezan os traballos na cabeceira sur da Ponte do Burgo

32
  • Mañá comeza a instalarse o novo paso elevado fronte a Ponte mantendo o trazado do Camiño de Santiago. A obra obriga a pechar dous carrís da avenida de Bos Aires dende mañá até o mércores.
  • A obra estará cofinanciada por Fondos Europeos de Desenvolvemento Rexional (FEDER)

As obras da Ponte do Burgo, cofinanciada polos Fondos Europeos de Desenvolvemento Rexional (FEDER), entran mañá nunha nova fase de execución. Comezarán os traballos na cabeceira sur (a próxima a Valentín García Escudero) para resituar o paso de peóns na cabeceira da ponte que permita acceder directamente á praza onde se atoparon os achados arqueolóxicos da ponte medieval.

Estes traballos obrigarán a pechar un carril da avenida de Bos Aires en cada sentido dende mañá até o mércores, ambos días incluídos. O peche de mañá comezará ás 10.00 horas e os de martes e mércores será a partir das 09.00 horas.

Neste punto, o proxecto de reforma da Ponte do Burgo recolle que se muda o paso de peóns (agora situado á man esquerda en dirección ao centro histórico) para resitualo na cabeceira da ponte, dándolle continuidade ao trazado peonil histórico do Camiño de Santiago.

A obra consistirá na creación dun paso elevado de grandes dimensións para darlle continuidade ao Camiño de Santiago de tal xeito que os peóns podan entrar directamente na ponte.

Dende mañá, o proxecto da Ponte do Burgo executarase en todo o seu ámbito de actuación: 

  • Na cabeceira Sur, coa creación do novo paso de peóns cara Valentín García Escudero.
  • Na cabeceira Norte, no entronque con Domingo Fontán e Xoán Manuel Pintos, onde se está a deseñar unha gran praza de máis de 4.000 metros cadrados con máis de 40 árbores, mobiliario urbano, bancos e papeleiras. E onde continuará a plataforma única da ponte, pero con lousas de granito.
  • O taboleiro da Ponte do Burgo que se atopa nos últimos días de instalación do novo lousado de pedra, con plataforma única de 11 metros de ancho. Terá iluminación rasante indicando o Camiño de Santiago, e outra na varanda lateral (tamén rasante).

A obra civil da reforma da Ponte do Burgo foi adxudicada á UTE Imesapi – E.C.Casas por valor de 1.326.977 euros e a Setga a iluminación por 730.840 euros. En total, 2.057.817 euros. A licitación global de partida era de 2.561.390,91 euros: a obra civil por valor de 1.700.598,75 euros e a iluminación por 860.792,16 euros.

A peonalización da Ponte do Burgo está incluída dentro da Estratexia de Desenvolvemento Urbano Sostible e Integral (EDUSI) Máis Modelo Pontevedra, financiada con 10 millóns de euros polos Fondos Europeos de Desenvolvemento Rexional (FEDER), a través do Programa Operativo de Crecemento Sostible 2014-2020. Esta reforma entra dentro da liña de traballo de mellora do Camiño de Santiago ao seu paso pola cidade, e na que tamén se inclúe a reforma da rúa Gorgullón, practicamente rematada.

COMPARTIR