- Tras o desprendemento de parte do arco da estatua, o Concello procedeu á retirada da totalidade deste elemento e constatou a ausencia de risco de máis desprendementos inminentes
O departamento municipal de Arquitectura está a analizar os materiais utilizados na escultura de Teucro, situada na cuberta do Auditorio Afundación, co obxecto de determinar se a permanencia desta estatua neste emprazamento podería implicar risco de novos desprendementos. Esta análise é necesaria tras o incidente ocorrido esta mañá (sobre as 11h) cando un fragmento do arco da estatua se desprendeu e caiu sobre a beirrúa, o que supuxo o corte inmediato de parte da rúa Augusto González Besada e da praza de San Xosé.
A zona foi reaberta dúas horas máis tarde, despois de que bombeiros e técnicos municipais revisaran a peza e concluíran que a base da estatua non representa risco de desprendemento inminente, pero que a parte do arco que non se desprendera non ofrecía os parámetros de seguridade requiridos, polo que procederon á súa retirada.
Tras esta primeira intervención, o Concello solicitou da entidade propietaria do inmoble un informe sobre os materiais utilizados na escultura co fin de determinar a súa seguridade no actual emprazamento e, no caso de ser pertinente, esixir responsabilidades polo incidente.
Ata o lugar desprazáronse efectivos da Policía Local e de Bombeiros, así como técnicos municipais e os concelleiros de Espazos Públicos Urbanos e de Urbanismo, Eva Vilaverde e Xaquín Moreda.