- O concelleiro socialista Iván Puentes acaba de contratar un plan de supervisión e avaliación do estado de diversas áreas de lecer para nen@s e da súa adaptación á normativa de seguridade
A Concellería de Desenvolvemento Sostible e Medio Natural, que dirixe o socialista Iván Puentes, levará a cabo durante as vindeiras semanas unha serie de actuacións destinadas a renovar as instalacións do parque infantil situado na rúa Bélxica, no barrio de Monte Porreiro. O proxecto deseñado pola Oficina Técnica de Arquitectura e Planeamento do Concello de Pontevedra contempla a revisión do estado de conservación do peche perimetral, a substitución de parte do pavimento e o arranxo dos xogos que se atopan en malas condicións polo uso.
Segundo subliña o concelleiro Iván Puentes, estes labores suporán un investimento de 2.795,44 euros por parte da Administración municipal e desenvolveranse nunha área de lecer “moi concurrida polas nenas e nenos do barrio de Monte Porreiro”. “Trátase dun parque infantil dun tamaño considerable -explica o edil do PSOE-, dotado de dúas grandes estruturas multixogos, catro tobogáns (dous deles mini), bambáns, dous resortes, unha randeeira-pendulo en forma de cesto, escaleiras e obstáculos de diversa dificultade, dous bancos e dúas papeleiras”.
Puentes considera que, en paralelo á creación de novas zonas de xogos naqueles barrios da cidade que as demanden, a Concellería de Medio Natural debe garantir que os espazos de lecer para os máis pequenos “se atopan en condicións óptimas para o seu uso”. Non obstante, o concelleiro socialista asinou esta mesma semana a contratación dun plan destinado á supervisión e avaliación do estado de conservación de varios parques infantís de Pontevedra, que fará especial fincapé na súa adaptación á normativa vixente en materia de seguridade.
