O Concello incorpora a cita previa online para axilizar a atención ao público

22
  • Estará operativa a partires de mañá na Sede Eletrónica ou en citaprevia.pontevedra.gal  e convivirá coa cita previa telefónica

A concelleira de Persoal, Carme Fouces vén de anunciar que a posta en funcionamento do sistema de cita previa online xa é inminente. En todos os servizos de atención ao público comezará a operar este sistema a partires de mañá, agás nos servizos de Benestar Social e Urbanismo nos que comezará nas vindeiras semanas por quedar pendentes pequenos flecos técnicos. 

A concelleira indicou que este sistema, que espera que sexa “cómodo e fácil” para a cidadanía, convivirá coa cita previa telefónica que se habilitara o pasado mes de maio cando os servizos municipais volveron a atender ao público de forma presencial. O acceao á cita previa online pode facerse a través da Sede Electrónica ou en citaprevia.pontevedra.gal

Ademais, ambos sistemas se complementarán coa atención específica para profesionais e empresas que operan co Concello, a través da instalación dun sistema operativo de videoconferencias que permita realizar xuntanzas telemáticas.

Carme Fouces volveu lembrar que este proceso de implementación de diferentes sistemas de atención está enmarcado no obxectivo “de modernizar e actualizar a Administración que xa estaba previsto pero que coas novas circunstancias houbo que facelo moito máis rápido do que tiñamos programado”. Na adaptación ás nova situación xurdida tras a pandemia, tamén citou a reformulación dos espazos onde se atende ao público como son as novas dependencias municipais en Ferreiros e as reformas de Michelena 30, a que está a piques de rematar na planta baixa para acoller os servizos de Padrón, Rexistro e Información Xeral, e a que se acometerá a partires de setembro no segundo andar onde se ubica o servizo de Intervención.

Indicou que a previsión é que “a cita online leve todo o peso” no referente a citas previas, pero que en todo caso se manterán tamén as citas previas telefónicas. O obxectivo último é o de evitar esperas ou aglomeracións de persoas nos servizos con atención ao público e que a atención sexa máis dinámica e con tempos de espera o máis curtos posibles.

COMPARTIR