Este sábado volve o Club de Debate, coa fase eliminatoria de Pontevedra, na que participarán 5 centros de ensino secundario público. Os debates comezarán ás 11 horas, no Pazo da Cultura, nunha completa xornada que rematará ás 19 horas, cando se darán a coñecer os nomes dos dous centros que pasarán á fase final, o domingo 26 de abril en Carballo.
Equipos que participarán o sábado:
- IES A Xunqueira 1
- IES Luís Seoane
- IES Valle Inclán
- IES de Ponte Caldelas
- IES Nº 1 (O Carballiño)
Membros do xurado:
- Susana Pedreira, xornalista en Onda Cero Radio
- Mercedes Torres, profesora de cursos Celga
- Olga Patiño, membro da Coordinadora de Traballadores/as de Normalización Lingüística (CTNL)
- M. Carmen do Campo, profesora de lingua galega en educación primaria
- Teresa Álvarez, profesora de lingua galega en educación primaria
Premios:
- Equipo campión:
- un vale de 500 euros para o equipo, para mercar libros e/ou banda deseñada en galego,
- un libro de discursos (Sempre en Galiza, de Castelao) para ter exposto no IES ata o vindeiro Club de Debate e
- o acceso á fase fase final galega.
- Equipo finalista:
- un vale de 300 euros para os membros do equipo, para mercar libros e/ou banda deseñada en galego e
- o acceso á fase fase final galega.
O Club de Debate é un programa que organiza o Concello de Pontevedra, a través da Concellaría de Normalización Lingüística, para promover o uso da lingua galega entre a mocidade. Este ano, o Concello de Pontevedra e o Concello do Carballiño colaboran na organización da fase eliminatoria que se desenvolverá na nosa cidade. Os dous equipos mellor clasificados en Pontevedra participarán na fase final, o domingo 26 de abril, en Carballo.
No 2015 tres zonas de competición agruparán os equipos procedentes dos diferentes concellos:
Carballo, Ferrol e Negreira
Ames, Rois e Santiago de Compostela
Pontevedra e O Carballiño
Obxectivos da actividade:
- Favorecer o emprego da lingua galega na mocidade, especialmente o uso oral en contextos formais e informais.
- Traballar no afondamento e no coñecemento dunha das habilidades sociais máis importante: a fluidez comunicativa, ligada á oratoria.
- Incitar o pensamento crítico e analítico sobre temas de actualidade, deixando de lado os estereotipos da mocidade en canto intereses e preferencias.
- Fomentar a diversidade de opinións, a tolerancia fronte a diferentes cuestións e o traballo en equipo.
- Colaborar cos ENDL dos centros de ensino secundario no labor de dinamización do uso da lingua galega para acadar a normalización do idioma.
O Club de Debate celebrarase este sábado, 7 de marzo, no salón de actos do Pazo da Cultura a partir das 10.15 horas, baixo o título “Vivimos un sistema corrupto”. A final galega será o 26 de abril, en Carballo baixo a temática “Herdamos o galego, temos que transmitilo”.