"Un orgullo para Pontevedra e unha iniciativa de fondo calado económico nestes momentos de crise". Así saudou o alcalde o proxecto Trigal, impulsado pola Asociación de Panadeiros Artesáns, para tratar de producir na comarca o trigo co que elaborar o "Pan da Vila", un produto para o que no seu momento se perseguirá a denominación de orixe.
Foi no decurso dunha entrevista co presidente e o tesoreiro do gremio dos panadeiros artesáns, liderado por Rogelio Acuña, que espuxeron ao alcalde as liñas que seguirán para conseguir a trazabilidade do seu produto, conscentes como son de que teñen que diferenciarse das grandes cadeas de distribución alimentaria, que utilizan pan conxelado para ofrecer aos seus clientes.
O gremio dos panadeiros artesáns establecerá un sistema para que os propietarios de fincas agrarias sementen e cultiven o cereal galego, co compromiso de compralo para elaborar con él o Pan da Vila, denominación que ten desde xa un produto que será presentado na proxima Feira do Pan, a celebrar entre o 23 e o 25 de marzo na Praza de España.
Os prazos que se barallan para ter o primeiro trigo callobre pontevedrés remiten a mediados do próximo ano, xa que a semente debe ser entre novembro e decembro, e a colleita arredor de xullo de 2013.
Un pan que procede da Masa Nai que nacía o pasado 1 de marzo no antigo balneario de Monte Porreiro, á beira do Lérez, mesturando fariña galega con auga do río. Chegará a todas as panaderías da cidade convenientemente fermentado e cocido, e dotado dunha vitola especial, símbolo da súa calidade.