Comeza a poda, limpeza e mantemento das especies singulares dos Xardíns de Vincenti

67

A Concellaría de Medio Ambiente, a través do departamento de Parques e Xardíns, comezou esta semana traballos de poda, limpeza e mantemento das especies máis singulares dos Xardíns de Vincenti. Expertos acometen a poda das palmeiras do paseo central, e tamén a revisión das ancoraxes dos Cedros do Himalaya .

Os traballos comezaron onte coa poda e limpeza das palmeiras que consiste na eliminación das ramas secas ou afectadas. Tamén se procede a subir a “balona” de cada unha das palmeiras, arredor un metro ou metro e medio segundo os casos.

Unha vez rematada esta poda, que se está vendo afectada pola chuvia, continuará coa revisión das ancoraxes e o retensado dos cables que sustentan as polas dos Cedros do Himalaya (están ao lado do café Branco e Negro e no parque infantil). Tamén se revisarán os tensores do cedro situado ao lado do ambulatorio Virxe Peregrina.