Un total de 200 profesionais do mundo do fútbol chegados de 16 países participarán no II Congreso Internacional Ciudad de Pontevedra, que se vai celebrar no Pazo da Cultura entre o 30 de maio e o 2 de xuño. O concelleiro de Deportes, Agustín Fernández, e o director técnico do evento, Alberto Argibay, presentaron hoxe unha cita que ao chegar a esta segunda edición converteuse xa nunha referencia deportiva do comezo do verán.
Agárdase a presenza do adestrador do Sevilla, Míchel (aínda que podería faltar a última hora); do Zaragoza, Manolo Jiménez; do Rayo Vallecano, Sandoval; do Besiktas, Carlos Carvalhal; do Sporting de Lisboa e o Benfica, Jorge Jesús. Tamén estarán os directores deportivos da Juventus, Fabio Paratici e do Sevilla, Monchi.
Argibay destacou a multiculturalidade do congreso. Na súa primeira edición recibiu a profesionais de 12 países, aos que nesta edición incorpóranse outros chegados de Austria, Italia, Holanda e Rusia. Destacou tamén a forte presencia de Portugal e Latinoamérica, especialmente de Venezuela.
O director técnico do Congreso subliñou a importancia de que coincida xusto antes do comezo da Eurocopa, no que, na súa opinión, incrementará a repercusión mediática. Á cobertura agardada por parte do Canal+ e o SportsTV portugués sumaranse varias cadeas xeneralistas e xornais e revistas especializadas de tiraxe nacional.
Sobre o programa do Congreso destacou que pásase das 21 ponencias en 8 áreas do pasado ano a 30 ponencias en 9 áreas (técnico-táctica, dirección deportiva, preparación física, readaptación, entrenamento específico, formación, medicina deportiva, psicoloxía deportiva e, finalmente, scouting e análise de xogo). As xornadas de mañá son abertas a varias áreas e as da tarde céntranse máis especificamente nas de técnico-táctica e dirección deportiva.
Agustín Fernández afirmou que este Congreso Internacional de Fútbol Ciudad de Pontevedra é un certame que “viste” a programación deportiva desta cidade. Lembrou que Pontevedra fixo unha aposta pola organización de eventos deportivos, pero o Congreso de Fútbol achega a peculiaridade dunha maior proxección mediática e un plus de prestixio.
Fernández destacou que durante catro días estarán entre nós estudantes de titulacións relacionadas coa actividade física, adestradores, dirixentes, especialistas da medicina deportiva e todo tipo de xente interesada no “deporte rei”.
Pontevedra é unha cidade de fútbol, rematou, polo que o acerto de ter organizado este Congreso é indiscutible.
Inicio Sin categoría