Pontevedra rebosou de deporte durante toda a fin de semana. Un total de cinco competicións e eventos deportivos con máis de dous milleiros de deportistas, encheron a cidade. Unha ampla programación que contou, na súa totalidade, co apoio da Concellería de Deportes, que dirixe Agustín Fernández González.
A cidade seguiu a celebrar o II Congreso Internacional de Fútbol, ao que se incorporou como prato forte o Campionato de España de Natación por Federacións de Persoas con Discapacidade, ademais do I Trofeo “Cidade de Lérez” de karate, o torneo 3×3 de basket “Crece con nós” e as probas da Liga Galega de kayak Polo.
A última peza desta programación foi o I Open Cidade do Lérez de taekwondo, que naceu, por suxestión da Concellería de Deportes, para cubrir o oco que había na promoción do deporte base nesta modalidade. O taekwondo está moi asentado na súa vertente competitiva, pero precisaba dun evento que servira de plataforma para os seus practicantes máis novos.
Agustín Fernández destacou que se á cifra de deportistas sumamos o público e os acompañantes, podemos falar perfectamente dunhas 4.000 persoas que pasaron pola cidade para participar ou presenciar algunha das competicións. Durante as xornadas previas, Fernández puxo especial empeño en recomendar a asistencia ao Campionato de España de Natación Adaptada, no que participan deportistas discapacitados que son exemplo de superación persoal.