Recepción ás medallistas pontevedresas no Campionato de España de Esgrima

65

O alcalde, Miguel Anxo Fernández Lores, recibiu, acompañado do titular de Deportes, Agustín Fernández, ao equipo da Escola Hungaresa de Esgrima de Pontevedra, que obtivo dúas medallas no recente Campionato de España de Esgrima.

Natalia Fernández obtivo a medalla de ouro na modalidade M-15. Xunto coas súas compañeiras Ángela de Faveri e Antonella Bunimov, acadou tamén o bronce na modalidade de equipos. Con elas estivo tamén o seu adestrador, Adrián Cubela.

O alcalde non dubidou en comprobar as características do sable de Natalia e foi informado sobre as peculiaridades deste deporte e da competición na que o deporte pontevedrés obtivo un novo trunfo.

A esgrima conta con Escola Municipal Deportiva e está a medrar na cidade, como demostran os recentes éxitos no Campionato celebrado na localidade madrileña de Moralzarzal.