Un encontro cos axentes sociais, celebrado hoxe na Casa das Campás, pretende ser un primeiro paso na busca dun consenso social amplo que permita expresar o rexeitamento contra as políticas de recortes e austeridade como fórmula única para loitar contra a crise económica. Varias decenas de persoas representativas de distintos sectores da cidade asistiron ao chamado do alcalde, Miguel Anxo Fernández Lores, no intento de buscar saídas.
Fernández Lores deixou claro o seu malestar diante da implementación dunhas políticas inxustas e insolidarias, que fan recaer o custo da crise sobre as capas máis desfavorecidas da poboación, mentres as perdas do gran capital e dos bancos se socializan.
O alcalde expresou o seu descontento polo círculo vicioso recortes-crise, estendeuse sobre os perniciosos efectos que está a sufrir unha cidade de servizos como Pontevedra, nas que os sectores público e comercial padecen especialmente, e adiantou a súa vontade de poñerse ao servizo de cantos queiran canalizar o seu descontento coas fórmulas que sexa.
Finalmente, tras unha intensa quenda de debate acordouse iniciar un proceso de cara á elaboración dun Manifesto que recollerá a preocupación existente en Pontevedra diante da crise económica e a disconformidade diante do xeito de abordala.