Segue aberto o prazo para inscribirse nas Escolas Deportivas Municipais que funcionan por iniciativa da Concellería de Deportes da man dos diferentes clubs, cun investimento público de 126.000 euros. O obxectivo destas escolas é promocionar o deporte entre a poboación en idade escolar para crear ou consolidar novos hábitos que contribúan á mellora da calidade de vida dos nenos, e inicialos na práctica polideportiva encamiñada a unha posterior especialización.
A aceptación desta nova convocatoria está a ser moi boa e mesmo supera as expectativas. Algunhas escolas xa esgotaron o seu cupo, debido a alta calidade da prestación durante os últimos anos. Dende a Concellería de Deportes, sublíñase que, diante deste ritmo de solicitudes, recoméndase que non se deixe a inscrición para última hora.
O obxectivo é iniciar á práctica deportiva aos nenos entre 4 e 14 anos en distintas modalidades deportivas como parte da súa educación integral.
As Escolas botarán a andar o luns, 1 de outubro.
Ofértanse 1.800 prazas en todas as modalidades e o prezo de inscrición é de 45 euros/anuais por neno en cada unha das escolas que participe. As inscricións deberanse realizar no Pabillón Municipal de Deportes (Instituto Municipal de Deportes-IMD), dende o mércores 12 de setembro no seguinte horario: 09.00-13.00 horas ou de 16.30 a 20.00 horas, de luns a venres.
Para máis información pódese chamar, no citado horario, ao número 986 87 20 13 ou mediante o correo electrónico a dirección imd@pontevedra.eu. Tamén pode consultarse toda a información nos seguintes enlaces https://www.facebook.com/imddepontevedra e
https://imdpontevedra.blogspot.com.es.
O concelleiro de Deportes, Agustín Fernández, destaca que as Escolas son a punta de lanza da política deportiva municipal, na medida en que expresan dun xeito claro o apoio ao deporte base e proporcionan aos clubs unha “canteira” de calidade coa que alimentar aos equipos nas súas sucesivas categorías. Unha fórmula, engade o concelleiro, que, ademais do beneficio social que proporciona, é obrigada en tempos de crise.
Fernández destacou que a política deportiva municipal terá sempre no apoio aos clubs e ao deporte base o seu principal referente. Se as restricións orzamentarias obrigan a facer recortes, faranse de xeito preferente no capítulo destinado á organización de grandes eventos deportivos.
Os rapaces interesados en inscribirse nas Escolas Deportivas desta temporada poderán escoller entre unha ampla oferta deportiva. Son 16 as disciplinas deportivas: Atletismo, Educación Física de Base, Baloncesto, Balonmán, Fútbol, Fútbol Sala, Judo, Ximnasia Artística e Trampolín, Ximnasia Rítmica e Acrobática, Tenis, Tenis de Mesa, Loita olímpica, Voleibol, Xadrez, Triatlón e Rugby.
A organización das Escolas corre a cargo de 25 asociacións deportivas do noso Concello, especialistas cada unha delas na modalidade deportiva que desenvolven:
Baloncesto Estudiantes de Pontevedra Arxil
Atletismo e educación física de base Sociedade Gimnástica
Fútbol masculino A. Juvenil de Lérez Fundación Pontetec Portero 2000 Salgueiriños S.C.D. Salcedo S.D. Monte Porreiro
Ximnasia artística Treboada Ximnasia Pontevedra
Ximnasia rítmica Treboada Ximnasia Pontevedra
Judo Judo Club Pontevedra
Tenis Club de Tenis de Pontevedra
Tenis de Mesa C. Tenis de Mesa Monte Porreiro
Balonmán Teucro Cisne
Fútbol sala mascul./fem. Leis 26 CDAR Xeve
Rugbi C. Mareantes Rugby Club Pontevedra
Loita Loita Pontevedra
Voleibol C. Voleibol Pontevedra
Xadrez Escola Xadrez Pontevedra