As obras de reurbanización do tramo da avenida de Lugo que entronca con Loureiro Crespo foron aprobadas hoxe pola Xunta de Goberno Local. O proxecto impulsado polo tenente de alcalde e concelleiro de Urbanismo, Antón Louro, parte cun orzamento de 1.246.480 euros, e será contratado por procedemento aberto.
A obra de transformación urbana de maior envergadura de cantas se van acometer durante este mandato contará con financiamento bianual, con 500.000 euros con cargo ao orzamento deste ano 2013 e o resto con cargo á anualidade de 2014.
Antón Louro destaca que coa aprobación deste expediente están xa en marcha as dúas iniciativas urbanas máis potentes do seu departamento: a avenida de Lugo e a rúa de Santa Clara (esta última orzamentada en 703.000 euros), polo que confía en que, en breve, ambas estean en obras.
O espírito do proxecto está no intento de embelecer unha entrada importante ao centro urbano e que agora presenta un aspecto totalmente inapropiado. Está redactado polos técnicos municipais e foi presentado aos veciños e comerciantes en senllos encontros protagonizados polo tenente de alcalde o pasado mes de abril.
Unha das principais intencións da actuación é a de incrementar a rotación dos aparcamentos, establecendo senllos cordóns de estacionamento en liña, e tamén en dotar á rúa de zonas de carga e descarga das que agora carece. A rúa, cun ancho superior a 24 metros, manterá o dobre sentido de circulación.
O prazo de execución será dun ano, dado que se trata dunha obra de gran volume. A pesar de que o tramo a reformar (entre a rotonda de Juan Carlos I (rotonda da serrería) e a do cruce da rúa San Mauro) ten unha lonxitude de só 258 metros, o gran ancho da vía fai que a superficie total a traballar alcance os 8.197 metros cadrados.
A obra dará gran importancia ao deseño das dúas rotondas que marcan os seus extremos. A de Juan Carlos I terá un diámetro interior duns 18 metros e un diámetro de circulación de 36 metros. A pequena rotonda da avenida de San Mauro, pouco funcional no seu actual deseño, ampliarase a 11,5 metros na súa estrutura interna e a 27,3 metros no bordo exterior de circulación.
En canto ás beirarrúas terán un ancho superior aos 3 metros e estarán realizadas con lastro (adoquín) cerámico e lousa hidráulica, adornadas por bandas de pedra. A ambos lados contarán cunha fila de cerdeiras.
A obra inclúe a renovación completa dos servizos de augas pluviais, saneamento, abastecemento de auga e rede contraincendios, así como a dotación do novo sistema de iluminación pública.