O departamento de Parques e Xardíns realizará nestes días un tratamento de urxencia ao cedro situado na entrada do ambulatorio da Peregrina, xa que moi recentemente foille detectado un ataque severo dun fungo (diploide phineas) que afecta ás coníferas.
O tratamento consistirá na aplicación de funxicidas por vías externas e internas do exemplar (endoterapia) co fin de eliminar o ataque.
Trátase dun fungo saprófito que se detecta, entre outros elementos, por un amarronamento do exemplar e por un marchitamento. Aparécenlle úlceras en tallos e brotes, e implica a caída das follas.
Segundo os técnicos do departamento de Parques e Xardíns, as causas do ataque hai que buscalas no duro inverno pasado, con moitas chuvias e temperaturas –relativamente- elevadas, unhas condicións climatolóxicas moi favorecedoras para a reproducción deste tipo de fungos.
O tratamento de choque previsto polo servizo de Parques e Xardíns, pretende frenar o ataque do fungo, aínda que resulta evidente que evoluciona moi rápido afectando severamente á esperanza de vida deste lonxevo exemplar.
Inicio Novas