Os veciños de Monte Porreiro estrean esta tarde, a partir das 17.30 horas, o Campo de petanca habilitado no Miradoiro nun campionato no que participarán equipos do barrio xunto a outros do resto do concello. Entre os participantes estarán os concelleiros Luís Bará, Anxos Riveiro e Miguel Filgueira.
O campo realizado pola Concellaría de Parques e Xardíns permite dotar de novos equipamentos esta zona de esparcemento da cidade. Nunha das parcelas do Miradoiro creáronse dúas pistas de 15×4 (cada unha) situadas preto do parque infantil e con acceso dende o paseo central. Teñen acabado en xabre e estarán enmarcados en madeira tratada. Son dous campos paralelos pero separados cun listón de madeira.
Os campos de petanca están unidos ao parque infantil cun sendeiro con lastro (material similar que existe na zona) co obxectivo de permeabilizar toda a zona de xogos do Miradoiro e facilitar, deste xeito, a socialización neste ámbito, lugar de encontro de persoas de todas as idades, que se completa con outras instalacións como a horta urbana, situada fronte a este espazo de xogos.
Ademais, este campo vén a sumarse a outras áreas de petanca que o Concello habilitou noutras parroquias e barrios da cidade como o de Campolongo ou o de Santo André de Xeve, tratando de fomentar este xogo colectivo tradicional.
Inicio Cultura e Festas