Volve o programa de Natureza nos camiños

80

A Concellaría de Parques e Xardíns volve a programar Natureza nos camiños que chega este ano á súa sexta edición da man da concellaría que xestiona Anxos Riveiro. Trátase de sete rutas que percorrerán espazos xa coñecidos pero tamén novas propostas para os participantes.
A primeira da rúa desenvolverase polo espazo da Rede Natura das ribeiras do Lérez este vindeiro domingo, 6 de outubro. Trátase dunha ruta que superará os sete quilómetros e que ten o seu punto de partida a carón da antiga Casa do Concello, na Alameda pontevedresa.
Todos os percorridos deste programa serán os domingos á mañá, a partir das 10.00 horas, con regreso ás 14.00 horas para aqueles que sexan dunha mañá; e ás 18.00 horas para os que sexan de día completo.
O fío condutor do programa deste ano serán os liques, fentos e brións, aínda que non faltarán as referencias a outros elementos da fauna e da flora dos bosques e doutros espazos naturais que se van visitar, xunto á interpretación de elementos da nosa historia, da literatura e da etnografía galegas.
Este ano combínanse as rutas que máis gustaron en edicións anteriores, con certas modificacións, xunto con novos percorridos por espazos practicamente descoñecidos para o gran público.
As sete rutas serán:
• Espazo natural das ribeiras do Lérez (7,2 km. aprox. Dificultade media);
• Meu Pontevedra. Salcedo e Castelao (8,3 km. aprox. Dificultade media-alta);
• As fontes e as augas de Xeve (12 km. aprox. Dificultade media);
• A fraga de Aboal, nos concellos de Pazos de Borbén e Mondariz (9 km. aprox.  Dificultade media-alta);
• Tras as pegadas do raposo e do lobo no Monte Tomba (7,7 km. aprox. Dificultade media-alta);
• Ermelo: A estela de Diego Xelmírez (7,4 km. aprox. Dificultade media-alta);
• Fragas do Eume, a última gran carballeira litoral do Atlántico.
As prazas son limitadas. Para anotarse cómpre chamar ao teléfono da Oficina de Medio Ambiente Natural: 986 100 185.