O Arxil e o equipo portugués do Olivais disputarán a 20ª edición do torneo de baloncesto Cidade de Pontevedra

74

Pontevedra comezará o ano deportivo con baloncesto. O Club Baloncesto Arxil e o Olivais de Coímbra disputarán a 20ª edición do Torneo Cidade de Pontevedra, que patrocina a Concellería de Deportes.
O torneo foi presentado hoxe polo concelleiro Agustín Fernández e a presidenta do club pontevedrés, Mayte Méndez. Durante o acto remarcouse o papel do Concello no apoio ao deporte local, especialmente á base. Fernández subliñou tamén que o deporte feminino, como factor de igualdade, constitúe unha das principais liñas de actuación do seu departamento.
O concelleiro lembrou tamén que, durante este ano, Pontevedra acollerá o Campionato de España de Baloncesto Infantil. Unha iniciativa que pretende ser tamén unha homenaxe ao traballo feito polo Arxil nos últimos anos.
O torneo Cidade de Pontevedra consistirá nun total de oito partidos nos que competirán, en modalidade de ida e volta, as distintas categorías de Infantil, Cadete, Junior e Senior de ambos equipos. O Arxil xa adiantou que, nas categorías de base, aliñará equipos distintos para dar participación ao máximo número de xogadoras.
Os partidos comezan mañá, sábado, día 4, no Pabillón de Maxisterio. Alí cruzaranse as diferentes formacións dende as 16 horas ata as 20,15 horas. Ao día seguinte, domingo, no mesmo escenario enfrontaranse os equipos Infantil e Cadete. Ao mesmo, tempo, no Estadio da Xuventude (CGTD), competirán os equipos junior e cadete do Arxil e o Olivais. Os partidos, nesta xornada de domingo, comezarán ás 10.00 e 12.00 horas.
Mayte Méndez desexou que en próximas edicións o Cidade de Pontevedra poda converterse nun trofeo triangular, algo que agora é imposible porque tan só conta co apoio da Concellería de Deportes.