As persoas interesadas en presentar ofertas polos postos vacantes do mercado municipal da rúa de Frei Xoán de Navarrete dispoñen dun prazo, dende hoxe, 5 de xuño, ata o próximo 9 de xullo. O Diario Oficial de Galicia publica hoxe o anuncio que abre formalmente o prazo do procedemento impulsado pola concelleira de Promoción Económica, Carlota Román.
A iniciativa engloba seis locais, aínda que, en realidade, cínguese a cinco espazos toda vez que dous deles están unidos. En concreto trátase dos locais 17 e 19 (15,51 metros cadrados), o 18 (11,17 metros cadrados), o 20 (17,30 metros cadrados), o 21 (10,23 metros cadrados) e, finalmente, o local número 22, con 12,23 metros cadrados. Todos eles están situados na galería do edificio de 41 vivendas, situada a carón da entrada principal do hospital Miguel Domínguez.
Os locais serán adxudicados por un período concesional de 25 anos. Os licitadores deberán presentar ofertas que, como mínimo, cubran o importe das taxas fixadas no prego de condicións. Os locais 17 e 19 parten cunha taxa de 32.968,86 euros; local 18, 23.745,43 euros; local 20, 31.986,53 euros; local 21, 20.331,64 euros e local 22, 23.175,76 euros.
Conxuntamente co procedemento de licitación ábrese tamén o trámite de exposición pública do expediente no seu conxunto, incluído o citado prego de condicións, por período de 30 días hábiles, ao obxecto de que polos interesados se practiquen alegacións, se así o entenden oportuno. Para o suposto de que se presentasen alegacións, o procedemento de licitación e os seus prazos quedarán en suspenso ata a resolución das mesmas. De non recibirse alegacións darase por aprobado definitivamente o expediente e prego de prescricións técnicas e cláusulas administrativas particulares que rexerán o procedemento.
Carlota Román destacou que trátase dun segundo paso na regularización administrativa dos Mercados Municipais. Lembrou que xa está a piques de rematar o proceso de adxudicación das vacantes na Praza de Abastos. E afirmou que, por primeira vez, o Concello pode asegurar que sacou a licitación a totalidade das prazas nestas dúas instalacións. Polo tanto, engade, pode concluírse que o grao de ocupación dependerá xa unicamente da demanda social existente. Se quedan vacantes, remarcou, será porque non hai interese social ou empresarial en ocupalos.