Mañá sábado continúan as actividades abertas á cidadanía para coñecer o patrimonio do Val do Tomeza e Salcedo. No roteiro que se celebrará a partir das 10.30 horas, percorrerase o Castro das Croas, os Muíños do Batán, a Esculca e o Outeiro da Mina-Pedra do Fundamento. A saída estará guiada polo antropólogo Rafael Quintía e a asistencia é libre sen necesidade de inscrición previa.
Recoméndase levar roupa e calzado cómodo, axeitado para andar por camiños de terra, sendas fluviais e pistas forestais. Nalgunhas zonas o terreo pode estar enchoupado e, de feito, a actividade podería suspenderse en caso de mal tempo.
A pasada fin de semana, preto de 40 persoas participaron no roteiro que se celebrou polo Monte das Croas, visitando o Castro e os Muíños do Batán, e que estivo guiado polo arqueólogo Eduardo Velázquez, de A Citania Arqueoloxía.
Actividades cos escolares
A vindeira semana está previsto (sempre que a climatoloxía o permita) que se celebren as visitas de escolares que esta semana se tiveron que suspender por mor do mal tempo.
Con esta actividade, o Concello busca que os máis pequenos tamén se acheguen á arqueoloxía e coñezan de primeira man os traballos que se levan a cabo nun castro. Ademais, resulta moi interesante para eles descubrir como vivían os castrexos, saber de que se alimentaban e como era o seu xeito de vida, entre outras moitas curiosidades. n
Inicio Novas