Dende esta fin de semana todos os arenais do concello de Pontevedra estarán operativos para acoller aos bañistas que se achegan ás praias para sofocar o calor destes días.
Na praia fluvial do Lérez comezará a funcionar o servizo de socorristas que estará operativo até o mes de setembro como vén sendo habitual. O horario dos socorristas será de 12.30 a 20.30 horas, e durante os meses de xullo e agosto, polas tardes (de 16.30 a 20.30 horas, momentos nos que a praia ten máis afluencia de bañistas), o servizo estará reforzado con dous socorristas.
Ademais, durante o verán o quiosco estará pechado debido ao proceso concursal de Cogami, que tiña adxudicado este servizo, pero serán os socorristas os que abrirán os baños durante o tempo que estean de servizo.
Na praia fluvial de Ponte Sampaio tamén remataron os traballos de mantemento para que estea nas mellores condicións de cara ao verán. Nas fins de semana atenderá as emerxencias un servizo da Cruz Vermella de 12.00 a 20.00 horas. Este servizo estará operativo de 15 de xuño a 15 de setembro.