O Concello de Pontevedra porá en marcha a sede electrónica a partir do 1 de marzo. A súa dirección será sede.pontevedra.gal e dende ela o Concello pretende abrir toda a tramitación administrativa aos usuarios. Inicialmente poderán realizarse tramitacións sinxelas como a comunicación da conta corrente; declaración de datos fiscais; solicitude xeral ante o Rexistro… pero o resto de trámites iranse implementando semana a semana como o pago de tributos ou os trámites ante o Servizo de Urbanismo.
A sede electrónica está dividida en dúas partes: a parte pública na que se ofrece un catálogo de procedementos que se poden realizar ou dos que se informa para poder executalos, unha parte de transparencia onde aparece o taboleiro de anuncios (que substitúe o físico na entrada do Concello), o perfil do contratante, o emprego público, os servizos tributarios, a normativa municipal, os impresos…
A parte privada é aquela que permite ao administrado coñecer os seus expedientes dentro da administración, así como o pago de recibos, entre outros. Para iso, será preciso acceder a través do DNI electrónico, dunha certificación dixital ou dunha clave que proporcione o propio Concello. Para iso, será necesario solicitalo ante o Rexistro Municipal.
Esta mañá, o concelleiro de Réxime Interior, Vicente García Legísima recoñeceu que a sede electrónica é unha obriga legal, pero tamén un desexo de todo o Concello: “levounos máis tempo do previsto, pero foron poucos os medios e moitos os esforzos para que funcione cun mínimo de garantías”.