O Concello de Pontevedra iniciará esta semana a instalación de pasos de peóns elevados e redutores de velocidade en distintas rúas do centro da cidade onde se teñen detectado velocidades excesivas poñendo en risco a integridade das persoas e dos condutores. Nalgún destes “puntos negros” chegáronse a rexistrar velocidades de até máis de 80 quilómetros/hora.
A intervención comezará pola rúa Alcalde Hevia con San Pedro Alcántara, onde está previsto a instalación dun paso de peóns elevado. E unha vez que remate a empresa adxudicataria (Ediserpo), continuará pola avenida de Vigo e Eduardo Pondal.
Na avenida de Vigo instalaranse tres redutores de velocidade en distintos tramos: no tramo entre San Pedro Alcántara e a rotonda con Fernández Ladreda, entre o hotel Galicia Palace e o IES Frei Martín Sarmiento.
Tamén está previsto a instalación de dous pasos de peóns elevados na rúa Eduardo Pondal, no tramo entre a rotonda de Uxío Novoneira e a ponte da avenida de Vigo. Elevaranse os dous pasos de peóns da rúa.
Estas actuacións completan a xa iniciada na rúa Loureiro Crespo, onde se instalaron redutores de velocidade no tramo entre Doce de novembro e a avenida de Lugo, e a que está prevista realizar na avenida de Bos Aires, no tramo entre as pontes de Santiago e dos Tirantes para dar maior seguridade ao tramo no que se atopa o CEIP Manuel Vidal Portela.