O alcalde de Pontevedra, Miguel Anxo Fernández Lores fixo esta mañá unha valoración moi positiva da viaxe institucional realizada á Corea do Sur, á localidade de Jeonju, da que “confiamos que traia retornos de todo tipo, especialmente de carácter turístico”, aseguraba.
Explicou que Corea do Sur é unha potencia emerxente “cunha capacidade económica evidente”, e a delegación pontevedresa acudiu para participar no Congreso Internacional das Cittaslow e para asinar un acordo de colaboración coa cidade de Jeonju (de 700.000 habitantes e cunha área metropolitana de 3 millóns) para fomentar as relacións de todo tipo entre as dúas cidades.
No Congreso Internacional das Cittaslow, Pontevedra recibiu o primeiro premio que entrega esta entidade, e resultou gratificada xunto ás vilas de Asolo, en Italia, e Katoomba, en Australia, recoñecidas tamén polas súas boas prácticas.
Na sinatura co alcalde de Jeonju, SeungSu Kim amosouse moi interesado no modelo de Pontevedra e expresoulle a Fernández Lores o interese de moitas cidades coreanas en coñecer o modelo de cidade de Pontevedra. De feito, no congreso estaban presentes políticos ou técnicos de todas as cidades coreanas que forman parte das Cittaslow:
-
- Jecheon
- Yeongwol
- Yeongyang
- Cheongsong
- Sangju
- Hadong
- Wando
- Shinan
- Damyang
- Jeonju
- Taean
- Yesan
- Namyangju
A visita de Pontevedra a Jeonju tivo moita repercusión na prensa coreana, tanto de ámbito local, como provincial e nacional, nas que falan de Pontevedra como a cidade do futuro, avalada polas Nacións Unidas, e con visión de futuro.