- A convocatoria para Eduardo Pondal está prevista para o luns, 5 de febreiro, ás 20.30 horas no Local Social do Gorgullón.
Os concelleiros Demetrio Gómez e Alberto Oubiña participaron na tarde-noite do venres na asemblea aberta convocada no Centro Leste para informar do proxecto municipal da compostaxe, os proceso da compostaxe e como compostar. Estiveron acompañados do equipo de mestres composteiros que están a participar no despregue da compostaxe no concello.
O obxecto da reunión foi informar do proceso que está a levar adiante o Concello en distintos puntos do municipio, animando aos veciños que o desexen a solicitar ao Concello, a través das súas asociacións de veciños, a implantación dun composteiro comunitario no barrio.
Ademais, na reunión tamén se explicou o proceso da compostaxe e resolvéronse dúbidas que propuxeron os asistentes.
Unha reunión similar celebrarase mañá, luns, 5 de febreiro, no Local Social do Gorgullón a partir das 20.30 horas, para todos os veciños de Eduardo Pondal que queiran coñecer o proxecto de primeira man; especialmente, tendo en conta, que os mestres composteiros xa aprobaron a instalación do composteiro de Eduardo Pondal con Teixoeira que poderá comezar a construírse nos vindeiros días.