O novo aparcadoiro de Tafisa e o viario de acceso engaden 350 prazas de estacionamento gratuítas á cidade

Queda aberto ao público definitivamente o novo aparcadoiro de borde, en superficie e de balde, situado na parcela pensada para o futuro edificio das Artes (antigos terreos de Tafisa), un espazo que ten cabida para preto de 150 vehículos. Porén o aforo real desta nova área duplica e máis a súa capacidade nominal xa que o viario de acceso ten estacionamentos en batería que suman outras 200 prazas de libre uso.

Este aparcadoiro fora aberto de xeito provisional -a falta do solo estabilizado- entre o 9 e o 26 de agosto, coincidindo coas festas da Peregrina. Concluído o tempo de asentamento da última capa de rodadura está listo para o seu uso.

A entrada ao novo aparcadoiro é pola rúa José Malvar, o mesmo acceso que para o aparcadoiro de auto caravanas. Nel fíxose unha actuación branda de xabre, non de asfalto na zona dada a intención da Universidade de Vigo de recuperar a parcela para construír alí o edificio das Artes. Mentres este proxecto non sexa unha realidade, o Concello de común acordo coa institución académica crea este novo estacionamento de borde.

O Concello de Pontevedra pon a disposición da veciñanza e visitantes máis de 2.000 prazas de estacionamento en superficie gratuítas en dez aparcadoiros de borde -ou disuasorios-, ademais dun párking de auto caravanas.

Aparcadoiros de borde existentes:

• Aparcadoiro nos terreos do futuro Edificio das Artes, 150 prazas máis 200 na vía de acceso.
• Cabeceira da ponte dos Tirantes (ao carón do parking de autocaravanas), 65
• Ao carón do Estadio de Pasarón, 10
• A Parda, 100
• Explanada do recinto feiral e Rafael Areses 700
• Xosé Manuel Pintos (fronte ao Pavillón Municipal), 300
• Rúa Alexandre Bóveda, 155
• Contorna do IES Torrente Ballester, 150
• As Corvaceiras, 160
• Mollavao, 185