- O proxecto de 2,3 millóns de euros dará servizo a 160 vivendas dos lugares de Campañó de Arriba, Piñeiro, Carballiños, Pedreira, Moldes e Freixo.
A empresa Viaqua iniciou hoxe mesmo os traballos de instalación da primeira fase do saneamento da parroquia de Campañó, a correspondente á zona sur, polo lugar de Campañó de Arriba. Este proxecto está financiado pola concesionaria do servizo do Ciclo da auga e incluído dentro das melloras do contrato municipal asinado a finais do pasado ano.
Os traballos previos de roza nas vías, realizáronse a pasada semana e hoxe xa se trasladou a maquinaria para abrir as gabias e instalar a tubaxe do saneamento que ten un orzamento de 2.303.666,67 euros e dará servizo a 160 vivendas (o investimento por vivenda é de 14.397 euros).
A primeira fase do saneamento de Campañó instalará a rede nos lugares de Campañó de Arriba, Piñeiro, Carballiños, Pedreira, Moldes e o Freixo.
A zona norte
A segunda fase do proxecto, a correspondente á zona norte, terá un orzamento de 1.818.000 euros, dará servizo a 108 vivendas, instalará 6.250 metros lineais de tubaxe e colocará 180 pozos de rexistro. Está previsto para os lugares de A Galiana, Corredoira, Soutonovo, Avieiros, Sabarís, A Cañota, Ferreiros e unha parte de Moldes.