- O concelleiro de Deportes, Tino Fernández, anuncia un aumento da oferta en 700 prazas. As axudas pasarán de 60 a 82 € por neno
- As EDM abrirán o vindeiro luns o prazo de preinscrición cunha oferta de 2.500 prazas para unha vintena de disciplinas deportivas
As Escolas Deportivas Municipais (EDM) abrirán o luns o prazo de preinscrición para o período 2019-20 cunha oferta máxima de 2.500 prazas, o que supón un incremento dunhas 700 prazas con respecto ás 1.800 que a Concellería de Deportes ofertara para 2018-19. Segundo anunciou o socialista Tino Fernández, o departamento que dirixe incrementará en 108.000 euros a achega destinada a subvencionar as EDM, pasando dos 142.000 euros de 2018-19 a 250.000, o que se traducirá nun aumento das axudas en 22 euros por rapaz inscrito (de 60 a 82 euros por neno).
A proposta abrangue unha vintena de disciplinas diferentes impartidas por entidades sen ánimo de lucro, para as que se estableceu unha cota de participación de 50 euros para todo o curso escolar. Tino Fernández sinala que, se ben a oferta inicial que sairá o luns será de 2.410 prazas, esta poderase incrementar “ata o tope de 2.500 no caso de que exista máis demanda”.
“A estas prazas -lembra o edil do PSOE- hai que sumarlles outras 600 das EDM rurais (mantense a cifra con respecto a 2018-19), o que supón unha cifra global de 3.100 prazas, sen contar ás das EDM para grupos especiais. No caso das escolas rurais a achega pasaría de 24.000 a 30.000 euros, o que nos permite pasar de 40 a 50 euros de axuda por neno, e nas de grupos especiais pasaremos de 10.000 a 15.000 euros (un 50% de aumento)”.
Os interesados terán de prazo para face-la preinscrición até o xoves, día 19 de setembro, e poderán realizala tanto presencialmente no Pavillón Municipal de Deportes (rúa Xoán Manuel Pintos, s/n), en horario de 08.30 a 13.30 horas e de 17.00 a 22.00 horas, como a través da sede electrónica do Concello (https://sede.pontevedra.gal, no procedemento 206), dende as 00.00 horas do luns até as 23.59 do xoves.
Por sorteo público cando exista máis demanda que oferta
O concelleiro de Deportes subliña que nesta primeira fase de preinscrición “haberá que presentar unicamente un formulario oficial totalmente cuberto e non se pedirá ningunha documentación persoal, nin DNI, nin seguros, nin pagos en bancos”. Tal e como aclara Tino Fernández, “non se trata dunha matriculación e, polo tanto, aínda non se adxudica a praza na EDM desexada”, senón que “naqueles casos nos que exista máis demanda que oferta, levarase a cabo un sorteo público entre tódalas solicitudes presentadas”.
“En consecuencia, os rapaces que se preinscriban o luns ás 8.30 horas e o xoves ás 21.59 horas, ou que o fagan por internet, terán as mesmas oportunidades de acceder á matrícula”, explica o edil do PSOE.
Entre o mércores 25 e o xoves 26 de setembro, en horario de 10.00 a 13.30 horas e de 17.00 a 22.00 horas, publicaranse os listados provisionais de preinscritos en cada Escola Deportiva Municipal no taboleiro oficial do Pavillón de Deportes, na páxina de Facebook ‘Deportes Pontevedra’ e na web do Concello ‘https://www.pontevedra.gal’ (na área de Deportes). En caso de que alguén detectara erros ou incidencias neses listados provisionais poderá comunicalo durante as propias xornadas do mércores e o xoves, en horario de 08.30 a 14.30 horas, nas oficinas do Servizo Municipal de Deportes, telefonicamente no 986 872 013 ou mediante o correo electrónico ‘admindeportes@pontevedra.eu‘.
As listas das Escolas Deportivas Municipais nas que a demanda supere á oferta serán expresamente anunciadas para que os interesados poidan acudir, se así o desexan, á fase de sorteo público. Nos demais casos, informarase de que xa están en condicións de formalizar a inscrición. O sorteo público desenvolverase nas oficinas do Servizo Municipal de Deportes (no Pavillón) o venres 27 de setembro a partires das 12.00 horas.
Listas definitivas e inscrición final
Os listados definitivos serán publicados o luns 30 de setembro no taboleiro oficial do Pavillón Municipal, na páxina de Facebook ‘Deportes Pontevedra’ e na área de Deportes da web do Concello. A fase de inscrición final levarase a cabo no mesmo lugar no que vaia a desenvolverse a actividade e xestionarase directamente coa entidade organizadora do seguinte xeito: entregaráselle ao responsable da mesma antes do 18 de outubro unha ficha de inscrición totalmente cuberta, xunto co DNI d@ representante legal d@ menor, a tarxeta sanitaria d@ rapaz@ e un xustificante do pagamento da matrícula.
A oferta das Escolas Deportivas Municipais inclúe tríatlon, atletismo, baloncesto, rugby, fútbol, voleibol, fútbol sala, balonmán, esgrima, tenis, padel, bádminton, judo, loita olímpica, taekwondo, ximnasia rítmica, xadrez, escalada deportiva, ximnasia acrobática, orientación deportiva e ximnasia trampolín. Tanto a información pública relativa ás EDM como a referente ao procedemento de inscrición sairán publicadas no Facebook de ‘Deportes Pontevedra’ (no enlace https://www.facebook.com/events/518037882291503/) e no blog do Servizo Municipal de Deportes (https://deportepo.blogspot.com/).