- A área que xestiona Xaquín Moreda permitirá o cambio de datas de apertura para furanchos e loureiros que non puideron abrir por mor do estado de alarma
- Introducirá cambios na ordenanza municipal de cara ao ano que vén para incluír situacións de excepcionalidade no perído de actividade
O concelleiro de Urbanismo, Xaquín Moreda, mantivo esta mañá unha xuntanza cos representantes da Federación de Furancheiros, Loureiros e Viticultores de Pontevedra, Lucía Josefa Gómez e José María Fernández Cortizo, na que a ampliación do período de apertura para furanchos e loureiros foi a principal demanda. Neste sentido, a ordenanza do Concello de Pontevedra estipula que este período de apertura remata o 30 de xuño, o que a raíz do decreto do estado de alarma o pasado mes de marzo restrinxe considerablemente o período de apertura destes establecementos.
Ante esta situación excepcional, Xaquín Moreda expúxolles que, a pesares de que non sería posible introducir e aprobar cambios na ordenanza municipal en prazo antes do 30 de xuño, desde o Concello xa lle remitiu á Xunta unha solicitude para que o Centro de Coordinación Operativa (Cecop) reformule a “recomendación” aos Concellos para extender o prazo para a actividade dos furanchos cara a unha “habilitación expresa”. O texto proposto na solicitude do Concello de Pontevedra é o seguinte: “habilitar aos Concellos competentes, de xeito excepcional e extraordinario e con independencia do que se determine nas Ordenanzas municipais vixentes, para que poidan, a través dos seus órganos de goberno, adoptar acordos que autoricen a ampliación da tempada 2020 dentro dos límites establecidos no Decreto 215/2012, xa que o estado de alarma actual ten unhas consecuencias no sector que poden minorarse ou paliarse cunha extensión no tempo da súa actividade máis aló dos períodos inicialmente autorizados, sendo prioritario limitar en todo o posible os efectos da crise provocada pola pandemia do coronavirus”.
Doutra banda, Xaquín Moreda confirmoulle aos representantes dos furancheiros e loureiros que desde o seu departamento se permitirá o cambio nas datas de apertura (á maioría coincidiulle en pleno confinamento domiciliario) e que de cara á vindeira tempada se introducirá unha modificación na ordenanza municipal para contemplar situacións de excepcionalidade como a actual.