- O evento será inaugurado o vindeiro mércores nun acto no que participarán o presidente de Aempe, José María Corujo, e a edil de Promoción Económica e Universidades, Yoya Blanco
- Entre as actividades inclúense charlas de orientación universitaria e emprendemento, talleres de dixitalización, emprego e igualdade e demostracións técnicas de fisioterapia
A reapertura ao público do Recinto Feiral para a celebración de grandes eventos trae consigo o regreso dunha das súas feiras máis senlleiras: a décima edición do Salón de Oferta de Educación e Formación de Galicia ‘Edugal 2021’, que se desenvolverá os días 20, 21 e 22 coa participación de máis de 50 expositores. O programa de actividades deste ano incluirá mesas redondas, conferencias, obradoiros e showcooking, nunha feira que axudará aos estudantes a decidir eficazmente o seu futuro formativo e profesional e no que está representada practicamente toda a oferta de centros educativos e formativos, empresas e entidades que dan resposta ás necesidades dos alumnos que precisan elixir o centro no que formarse para acceder ao mercado laboral.
O salón, organizado pola Asociación de Empresarios da Pequena e Mediana Empresa de Pontevedra (Aempe) e a Concellería de Promoción Económica e Turismo en colaboración coa Deputación e a Universidade de Vigo, pretende dar así continuidade á orientación académica, facilitar unha axeitada decisión sobre o futuro profesional e acadar unha maior calidade na formación. Edugal abrirá as súas portas o mércores 20 e o xoves 21 en horario de 10:00 a 18:00 horas e o venres 22 de 10:00 a 14:00 horas, contando con xornadas técnicas nas que se realizarán conferencias, charlas de orientación, obradoiros e demostracións dirixidas a estudantes que lles axudarán a ter máis claras as opcións formativas das que dispoñen; e visitas programadas para grupos escolares acompañados dun profesor ou titor (concertadas coa organización).
Tal e como explica a concelleira de Promoción Económica, Turismo e Universidades, Yoya Blanco, “este salón é unha aposta polo futuro inmediato da formación en Pontevedra e Galicia” e está orientado a alumnos e estudantes potenciais, “en especial de aqueles estudantes que estean finalizando a ESO, o Bacharelato ou ciclos formativos”; profesionais do ensino; centros educativos (universidades, facultades, escolas, institutos, centros de FP…); formadores para o emprego (orientadores, recursos humanos, consultores, formación continua a empresas…); empresa do sector público, “e ao público en xeral interesado en charlas formativas e información sobre formación e emprego”. “Un público potencial de máis de 10.000 persoas -apunta Blanco-, tendo en conta os mozos que comezarán estudos superiores ou profesionais e aqueles profesionais en situación de desemprego”.
Á cita, que terá entrada de balde, están convocados centros educativos públicos, concertados e privados, campus universitarios, centros de formación, fundacións, empresas con FP Dual, empresas de material escolar, compañías de Tecnoloxías da Información e a Comunicación (TIC) e robótica, startups, escolas de idiomas, formación no estranxeiro, danza e artes escénicas, conservatorios e Forzas Armadas Profesionais (Ministerio de Defensa).
O programa de actividades
O programa de actividades de Edugal 2021 porase en marcha o mércores 20 de outubro ás 11:00 horas na Sala A cunha mesa redonda titulada ‘Camiño á empregabilidade’, presentada pola directora xerente da Fundación Pública Galega da Formación para o Traballo (FPGFT), Rosanna Lózpez Salgueiro, e na que participarán o director da Fundación Ronsel, Luis Deber, dous mozos/as e un mentor/a. Nesta mesa darase a coñecer o programa formativo da FPGFT para mellorar a empregabilidade de persoas menores de 30 anos.
A continuación, ás 12:30 horas, terá lugar a inauguración oficial de Edugal, protagonizada polo presidente de Aempe, José María Corujo, e a concelleira socialista Yoya Blanco, que dará paso a un Showcooking da Familia Profesional de Hostalería FP no stand da Subdirección Xeral de Formación Profesional. Ás 13:00 horas a Asociación Juan XXIII desenvolverá no seu expositor un obradoiro de Demostración de Técnicas de Fisioterapia e entre as 13:30 e as 14:00 horas haberá unha charla sobre o Procedemento de acreditación de competencias profesionais (ARA) impartida pola Subdirección Xeral de Formación Profesional – Secretaría Xeral de Educación e FP.
Na Sala B do salón celebraranse diversas charlas de orientación universitaria: ás 11:00 horas unha sobre Visión Infravermella a cargo da Escola de Enxeñería de Minas e da Enerxía; ás 12:00 horas unha titulada ‘Gústanos a Química’, impartida pola Facultade de Química; ás 13:00 horas unha de ‘Traducir e interpretar no século XXI, da man da Facultade de Filoloxía e Tradución, e ás 16:00 horas outra de Risografía, organizada pola Facultade Belas Artes.
A xornada do xoves 21 de outubro abrirase na Sala A ás 10:00 horas coa actividade Erasmus Plus, sobre a internacionalización da Escola Superior de Arte Dramática de Galicia, e proseguirá ás 10:45 horas cun relatorio a cargo de Laura Sáez Rodríguez, U-TAD, acerca de As Profesións STEAM (ciencias, tecnoloxía, enxeñería, arte e matemáticas). A seguir, ás 11:30 horas celebrarase un Obradoiro de Habilidades Blandas e Dixitalización no que se presentará a Guía de Habilidades Blandas a través dunha charla coa interacción dun robot dirixida por Modesto Gómez, coach experto en Marketing e desenvolvemento do talento (actividade da FPGFT), e ás 12:30 horas dará comezo outro showcooking e a mesa redonda ‘Que podes estudar na Formación Profesional Galega?’, impartida pola Subdirección de Formación Profesional.
Xa pola tarde, ás 16:00 horas desenvolverase a charla ‘Ilerna Online e o éxito da FP a distancia’ e ás 17:00 horas un Obradoiro de Formación, Emprego e Igualdade, presentado por Rosanna López Salgueiro, moderado pola consultora de Igualdade María Buceta e no que intervirán representantes da Asociación de Jóvenes Empresarios (AJE), Empresarias Galicia e Aempe, dous formadores, dous orientadores e dúas mozas e mozos. Na Sala B están previstas novas charlas de Orientación Universitaria: ás 10:00 horas ‘Crea o teu perfil de Instagram con HTML’, impartida pola Escola de Enxeñería de Telecomunicacións; ás 11:00 horas ‘May the fire with you’, da Escola de Enxeñería de Minas; ás 12:00 horas ‘Gústanos a Química’, da Facultade de Química; ás 13:00 horas ‘Fai Historia con nós’, da Facultade de Historia, e ás 16:00 horas ‘Risografía’, da Facultade de Belas Artes.
O programa do venres 22 de outubro de Edugal abrirase na Sala A ás 10:00 horas coa presentación ‘Novos residuos… Novas solucións’, a cargo do CPR Eduardo Pondal de Cangas (Escola Asociada Unesco), e a celebración da mesa redonda ‘Profesionalización dos estudos en arte dramática: Dirección escénica e dramaturxia, Escenografía e Interpretación. Casos de éxito’, impulsada pola Escola Superior de Arte Dramática (Esad) de Galicia. Para as 12:30 horas están previstas a charla ‘Innovación, Internacionalización e Emprendemento na FP Galega’, impartida pola Subdirección Xeral de Formación Profesional – Secretaría Xeral de Educación e Formación Profesional, e máis un Showcooking da Familia de Formación Profesional de Hostalería.
A Sala B acollerá entre as 10:00 e as 14:00 horas (momento da clausura de Edugal) novas charlas de Orientación Universitaria sobre ‘Fisioterapia en Lesións Deportivas’ (Facultade de Fisioterapia); ‘Materiais Intelixentes e Outras Curiosidades’ (Escola de Enxeñería de Minas e da Enerxía); ‘Gústanos a Química’ (Facultade de Química), e ‘Acceso e matrícula na UVigo’ (Sección de Información ao Estudantado, SIE).
A relación de expositores desta 10ª edición do Salón de Oferta de Educación e Formación de Galicia está composta por:
- AEMPE
- AFN – AEROFLOTA DEL NOROESTE
- ASOCIACIÓN JUAN XXIII
- CENTRO EXAMINADOR OFICIAL DE CAMBRIDGE
ASSESMENT ENGLISH EN VIGO - CONSERVATORIO SUPERIOR DE MÚSICA DE VIGO
- EISV, ESCUELA DE IMAGEN Y SONIDO DE VIGO
- EPA PONTEVEDRA (EDUCACIÓN PARA ADULTOS)
- ESCOLA SUPERIOR DE ARTE DRAMÁTICA DE GALICIA
- ESCOLA DE CANTEIRÍA – DEPUTACIÓN DE PONTEVEDRA
- PLAN LABORA 2020 – DEPUTACIÓN DE PONTEVEDRA
- ESCOLA SUPERIOR DE CONSERVACIÓN E RESTAURACIÓN
DE BENS CULTURAIS DE GALICIA - ESCOLAS ASOCIADAS DA UNESCO
- FEDERACIÓN GALEGA DE FÚTBOL
- FORMARTE ESCUELA DE MODA
- FUERZAS ARMADAS
- FUNDACIÓN PÚBLICA GALEGA DA FORMACIÓN PARA O
TRABALLO - IES CHAN DO MONTE (Marín)
- IES GONZALO TORRENTE BALLESTER (Pontevedra)
- IES LUIS SEOANE
- IES PADRE SARMIENTO
- IES VILALONGA (Sanxenxo)
- ILERNA ONLINE
- O GARAXE HERMÉTICO
- RESA, RESIDENCIAS UNIVERSITARIAS
- SUBDIRECCIÓN XERAL DE FORMACIÓN PROFESIONAL.
CONSELLERÍA DE EDUCACIÓN - CIFP MANUEL ANTONIO (Vigo)
- CIFP VALENTÍN PAZ ANDRADE (Vigo)
- CIFP A Granxa (Ponteareas)
- CIFP A Xunqueira (Pontevedra)
- CIFP Carlos Oroza (Pontevedra)
- CIFP Coroso (Ribeira)
- CIFP As Mercedes (Lugo)
- CIFP Someso (A Coruña)
- UNED
- UNIVERSIDADE DE SANTIAGO DE COMPOSTELA
- UNIVERSIDADE DE VIGO E OS CENTROS:
- Campus de Ourense:
– FACULTADE DE HISTORIA
– FACULTADE DE CIENCIAS EMPRESARIAIS E TURISMO
– FACULTADE DE EDUCACIÓN E TRABALLO SOCIAL
– ESCOLA SUPERIOR DE ENXEÑARÍA INFORMÁTICA - Campus de Pontevedra:
– FACULTADE DE BELAS ARTES
– FACULTADE DE CIENCIAS DA EDUCACIÓN E DO DEPORTE – FACULTADE DE FISIOTERAPIA
– ESCOLA DE ENXEÑARÍA FORESTAL
– DIRECCIÓN E XESTIÓN PÚBLICA - Campus de Vigo:
– ESCOLA DE ENXEÑARÍA DE MINAS E DA ENERXÍA
– ESCOLA DE ENXEÑARÍA INDUSTRIAL
– ESCOLA DE ENXEÑARÍA DE TELECOMUNICACIÓN
– FACULTADE DE BIOLOXÍA
– FACULTADE DE QUÍMICA
– FACULTADE DE CIENCIAS DO MAR
– FACULTADE DE CIENCIAS XURÍDICAS E DO TRABALLO
– FACULTADE DE FILOLOXÍA E TRADUCIÓN
– U-TAD Centro Universitario de Tecnología y Arte Digital
– UE, UNIVERSIDAD EUROPEA
Pódese obter máis información sobre o evento a través da páxina web www.edugal.es, mediante o correo electróncio edugal@aempe.com ou chamando ao teléfono 986 86 63 76.