A pesar da crise da Covid e dos efectos no comercio local, Pontevedra mantén as cifras de reciclaxe de 2020 por riba das mil toneladas/ano en papel/cartón, envases e vidro.
O tratamento de materia orgánica a través dos colectores marróns ofrece os primeiros datos dun ano completo de xestión, achegándose, tamén, ás 1.000 toneladas/ano. A aposta pola compostaxe confirma unha reducción sostida no tempo das entregas do Concello a Sogama.
Estas cifras son un bo punto de partida para a posta en marcha do novo contrato de xestión destes recursos municipais que se baseará en obxectivos ambientais, entre eles, reciclar o 60% dos residuos en 2030, seguindo as directrices da UE.
A Concellaría de xestión dos residuos municipais que dirixe o concelleiro Raimundo González Carballo vén de recibir os últimos datos do sistema de reciclaxe do concello durante o 2021. A pesar da crise da Covid e da crise de consumo derivada dela, Pontevedra seguiu mantendo os seus niveis de reciclaxe en todas as fraccións: papel/cartón (colector azul), vidro (iglú verde) e envases (colector/iglú amarelo), superando en todos os casos as mil toneladas de reciclaxe ao ano.
Este bo comportamento tamén o tivo a fracción húmida, en concreto a compostaxe a través do colector marrón, que vai incrementando mes a mes, ao tempo que se van reducindo os envíos do colector verde (resto) á Sogama.
Os datos de reciclaxe son un bo punto de partida para a posta en marcha do vindeiro contrato de xestión dos residuos municipais no que traballa o Goberno Local, cuxa licitación comezará nas vindeiras semanas. O traballo realizado até o de agora e a implementación do novo sistema reforza a aposta ambiental da Pontevedra. Raimundo González recorda que “só pode facerse grazas á participación activa e concienciada dos veciños e veciñas de Pontevedra”.
Ao respecto das fraccións de reciclaxe en colector ou en iglú, os datos de 2021 revelan un lixeiro descenso ao respecto da recuperación do papel e do cartón, situándose en 1.525 toneladas, é dicir, arredor de 300 toneladas menos que en 2020, pero segue sendo a segunda cifra máis elevada de reciclaxe de papel e cartón no concello dende que hai rexistros. O servizo atribúe o descenso ás visicitudes do comercio local durante o pasado ano, xa que a principal baixada fíxase na recollida porta a porta dos establecementos.
Os datos do iglú verde, onde se depositan os vidros, manteñen o ratio de reciclaxe no pasado ano e están por riba das mil toneladas de depósitos; e o colector amarelo, de envases, superou en 21 toneladas a cifra de 2020 situándose en 1.178.
| Fraccións de reciclaxe | |||
| Papel/carton (kg) | Vidro (kg) | Envases (kg) | |
| 2011 | 1.127.490 | 823.760 | 596.150 |
| 2012 | 1.005.270 | 809.280 | 594.100 |
| 2013 | 885.710 | 877.650 | 599.820 |
| 2014 | 967.910 | 798.950 | 617.240 |
| 2015 | 883.920 | 826.200 | 618.715 |
| 2016 | 822.610 | 840.100 | 643.036 |
| 2017 | 786.110 | 842.330 | 665.080 |
| 2018 | 920.030 | 940.000 | 768.200 |
| 2019 | 1.409.169 | 1.080.410 | 1.021.020 |
| 2020 | 1.818.230 | 1.165.340 | 1.157.580 |
| 2021 | 1.525.367 | 1.162.180 | 1.178.360 |
O colector verde onde se deposita a fracción “resto” tamén tivo un bo comportamento xa que se van reducindo os envíos a Sogama derivados da implantación da compostaxe en todo o territorio: compostaxe comunitaria, compostaxe individual e compostaxe en colector marrón. Precisamente, nesta última tipoloxía recolléronse máis de 900 toneladas/ano de resto orgánico en 2021.
Cabe lembrar que a compostaxe en colector marrón implementouse na cidade naqueles barrios con moita densidade de poboación. Fíxose por fases. A primeira comezou a mediados de xullo de 2020 e a segunda ao longo do mes de marzo de 2021, polo que o ano pasado foi o primeiro con rexistros completos
A compotaxe responde á liña de traballo impulsada polo Goberno local no ano 2019 coa instalación de composteiros comunitarios xeralizados en todos os barrios e a entrega masiva de composteiros individuais nas vivendas do rural.
| Resto e colector marrón | ||
| Resto (Toneladas) | Colector Marrón (tn) | |
| 2011 | 30.284,77 | |
| 2012 | 29.470,26 | |
| 2013 | 28.516,92 | |
| 2014 | 29.217,42 | |
| 2015 | 29.246,62 | |
| 2016 | 29.533,12 | |
| 2017 | 29.627,93 | |
| 2018 | 29.719,77 | |
| 2019 | 29.478,78 | |
| 2020 | 28.282,26 | 310,80 |
| 2021 | 27.904 | 904,830 |
O contrato de xestión de residuos
Os datos de reciclaxe de 2021 por parte dos veciños e veciñas de Pontevedra son un bo punto de partida para a posta en marcha do contrato que xestionará os residuos municipais. Licitarase nas vindeiras semanas e estará baseado en obxectivos ambientais, polo que o Goberno parte dunha concepción radicalmente distinta dos residuos, do seu tratamento e da prestación do servizo entendido como até o de agora.
O novo contrato considerará os residuos como un recurso, seguindo as liñas de traballo de toda a normativa europea, estatal e autonómica en vigor ou en estudo, e cumprindo coa máxima do Goberno local: “O futuro será verde, ou non será”.
Busca cumprir coas esixencias da Unión Europea que incrementa as porcentaxes de reciclaxe dos residuos até acadar, cando menos, o 60% no ano 2030. O concelleiro Raimundo González xa adiantou que “a nosa aspiración é superar esa porcentaxe de mínimos legais”.
O concelleiro tamén adiantou que esta “revolución ambiental” que se porá en marcha no Concello neste ano só se poderá facer da man dos veciños e veciñas de Pontevedra. Eles e elas son a clave para que Pontevedra continúe a ser un referente ambiental.