A medida que os usuarios coñecen o servizo fan un uso maior do mesmo, cunha diferencia entre febreiro e marzo de máis de tres viaxes por día
O concelleiro de mobilidade, Demetrio Gómez, confía en poder comezar co funcionamento oficial do sistema de transporte a demanda entre finais de ano e principios do que vén
O Concello de Pontevedra avanza no proxecto de posta en marcha dun servizo de transporte a demanda e entra na recta final da primeira fase de probas do chamado Coche de Punto. O concelleiro de Mobilidade, Demetrio Gómez, deu conta esta mañá dalgúns dos datos que foron colleitados neste tempo e que poden ser de interese á hora de entender o funcionamento e as dinámicas no futuro servizo público promovido polo Concello de Pontevedra.
«Tratamos de someter o servizo ao maior estrés posíbel ao longo destas semanas, tal e como comentaramos no pasado», sinalou o edil. «Está funcionando perfectamente, o cal non quere dicir que poidamos ter constancia dalgún erro puntual, mais para iso é a fase de probas, localizalos, puílos e seguir traballando. Os erros que aparecen xa non é que sexan máis ou menos, que son menos, Senón que son anecdóticos como por exemplo a aparición dun enderezo en Campañó que coincide con outro na Coruña e por algún motivo a intelixencia artificial da aplicación escollía o máis afastado…. Agora xa está corrixido este problema e sempre se escolle o punto máis próximo a Pontevedra no caso de coincidencia».
Até o día de hoxe, nos últimos 37 días foron realizadas 291 viaxes, o que resulta nunha media de 7,86 viaxes por día, cun pico de usuarios o 17 de febreiro e o 8 de marzo —con 14 viaxes— e un pico á baixa o 1 e o 3 febreiro, e o 2 de marzo —con 0 viaxes—. Porén, é posíbel facer fincapé na media mensual, que quedaría cun mes de febreiro cunha media de 6,45 viaxes por día, e unha media en marzo de 9,52 viaxes por día; o que deriva nunha clara tendencia á alza e que en palabras de Gómez partiría a idea de que «segundo as persoas van coñecendo o sistema do Coche do Punto máis o usan. Supoñemos que aumentará moito máis unha vez solucionemos todos os problemas de accesibilidade que teñen, por exemplo, as persoas maiores, co rexistro ou o uso da aplicación. Aínda sen iso, vemos como aumenta o número de viaxes»
Doutra banda, durante a fase de probas foron percorridos un total de 1.742 quilómetros —o límite marcado para a finalización da fase de probas é de 3.000, mais non se espera chegar a el antes do 31 de marzo, data de finalización da mesma—. En febreiro isto sería derivaría nunha media de 37,3 quilómetros ao día, e en marzo de 58,47 quilómetros ao día de media. De novo é posíbel percibir ese aumento.
A día de hoxe, o servizo conta con 46 persoas usuarias. A media de viaxes por persoa sitúase en 6,32. A persoa que máis usos realizou chegou até os 41, logo dez persoas só fixeron unha viaxe, mais a moda —o dato que máis se repite entre os usuarios— é de 2 viaxes —trece persoas usaron o servizo dúas veces—.
A duración media da viaxe situase nos 12 minutos, cun custo medio de 11 euros por viaxe. O promedio de persoas viaxeiras no coche é de 1,21, polo que principal son viaxes individuais. «É normal, pois aínda non é un transporte xeralizado», explicou o edil, que tamén lembrou que esta semana o Concello recibira o informe positivo desde a Xunta de Galicia para a modificación da ordenanza de taxi de Pontevedra, e permitir que o Coche de Punto poida ser implantado ou usado a través desta rede.
«Todo segue en marcha e no camiño, polo que non vemos motivo para que o Coche de Punto no se poña a funcionar antes da primavera do ano que ven, entre finais do 2022, principios do 2023», finalizou Gómez.