O edil de Xuventude, Alberto Oubiña, presentou este mércores os novos programas destes ciclos para a mocidade pontevedresa que xa teñen abertos os seus buzóns de solicitudes
O concelleiro de Xuventude, Alberto Oubiña, presentou esta mañá de mércores, 19 de outubro, unha nova edición da Escola Feminista para a Mocidade e unha nova edición de Pisando Forte, dous programas diferentes pero relacionados, procurando o primeiro ser un espazo activo de formación, encontro e reflexión colectiva con perspectiva feminista dirixida preferentemente á mocidade de 15 a 35 anos; e o segundo un programa formativo para a autonomía e desenvolvemento persoal pensada para xente moza de entre 15 e 35 anos; a través de formacións de carácter totalmente flexible, dinámico, participativo e diverso.
O edil lembrou que desde a pandemia da Covid-19, o equipo que forma a área de Xuventude formulou unha idea de traballa ao redor de cinco bloques ou cinco programas: Ponteverán, Xeración Sónica, Noites Abertas, Escola Feminista para a Mocidade e Pisando Forte.
Estes dous últimos programas serán desenvolvidos desde novembro e até marzo do vindeiro ano. O obxectivo destes núcleos «é ofrecer unha programación diversa para a mocidade, que teña en conta a súa formación, as súas inquedanzas e as novas maneiras de ver o mundo, xunto con todas aquelas necesidades que van xurdindo», explicou Oubiña.
Pisando Forte é un ciclo de actividades que foi evolucionando ao longo das edicións, partindo da empregabilidade, até chegar a novas demandas e novas cuestións. O programa deste ano inclúe os seguintes cursos:
- Curso de manipulación de alimentos e normativa de alerxias e intolerancias (en liña e presencial)
- Obradoiro Maldita.es: para que non cha Coen. Distingue a información fiable
- Baño de Bosque (Shirin Yoku)
- Curso de Produción Musical
- Obradoiro de emprendemento
- Obradoiro Maldita.es: Ciberseguridade, saúde dixital e erradicación do odio na rede
- Obradoiro de saúde e conciencia social
- Obradoiro de Teatro-Improvisación para a procura de emprego
Pola súa banda, a Escola Feminista da Mocidade contempla as seguintes actividades:
- Club Bordadoras feministas: Obradoiro ‘Construíndonos en tea’
- Círculo de Empatía
- Interseccionalidade e teatro da oprimida. Privilexios dunha muller branca
- Sexo, poder e parella
- Club Bordadoras feministas: Obradoiro ‘Borda o teu manto 8M’
- Como axudo? Modos de acompañar as afectadas polas violencias machistas
- Agresións sexuais. Conversas entre iguais
- Racha co teu macho
En total, ambos os dous cursos contan cun orzamento de 18.500 euros —10.500 de Pisando Forte e 8.000 euros da Escola Feminista—. Toda a información dos programas, a reserva de prazas, a tipoloxía das actividades e demais pode ser consultada nas webs do Concello www.apuntante.pontevedra.gal e tamén wn www.xuventude.pontevedra.gal.
As actividades están pensadas, nun principio, para persoas de entre 15 e 35 anos, se ben, no caso de quedar prazas baleiras podería ampliarse este rango de idade, polo que desde o Concello se insta a formalizar igualmente a reserva, aínda sen estar dentro da idade suxerida.