Esta nova incorporación de terreo podería ser utilizado para crear un acceso peonil ou lograr unha distribución máis efectiva dos equipamentos que se construirán o día de mañá
A portavoz do Goberno, Anabel Gulías, deu conta esta mañá de luns da Xunta de Goberno Local celebrada a primeira hora da mesma. Dentro dos asuntos tratados na orde do día, Gulías apenas quixo facer fincapé no punto relacionado co inicio do expediente para a licitación da creación do CPD e a renovación parcial da rede municipal electrónica, que vén a ser a ausencia de conflitos de interese, un paso máis na súa tramitación.
Doutra banda, e xa afondando nos asuntos tratados fóra da orde do día, a edil quixo sinalar a proposta chegada até a XGL para a expropiación dunha parcela na rúa Tomás y Valiente. Esta expropiación garda relación co anteproxecto de axeitamento da parcela municipal para o pavillón da Parda. «Damos un chanzo máis na vindeira construción deste pavillón», explicou Gulías. «Xa expropiáramos unha serie de parcelas para este futuro equipamento, en concreto tres. Lograbamos a titularidade municipal de todos os terreos nos que se vai construír o pavillón. Agora, con esta nova expropiación, engadimos unha porción de terreo que conta cunha superficie de 466,60 m2, o que permitirá crear un acceso peonil ou lograr unha distribución máis efectiva no día de mañá».
A expropiación será realizada por un importe 184.448,85 euros. «Daríamos por rematado o proceso de expropiacións con este terreo, o que nos permitirá seguir avanzando na licitación do futuro pavillón da Parda», concluíu a portavoz.