O Tribunal administrativo de contratación pública de Galiza notificou a presentación de dous recursos aos pregos, que paralizan o procedemento pero non o prazo de presentación de ofertas. A Xunta de Goberno acordou suspender, tamén, ese prazo mentres se resolven os recursos, que será nunhas tres ou catro semanas.
Raimundo González defende esta actuación porque “é un contrato importante, novidoso e de vangarda que persegue obxectivos ambientais e o cumprimento da nova lei, polo que é preciso traballar con seguridade xurídica”.
A Xunta de Goberno Local acordou esta mañá a suspensión cautelar do prazo de presentación de ofertas do novo contrato de xestión de residuos do Concello de Pontevedra que supera os 233 millóns de euros. O concelleiro delegado do servizo, Raimundo González explicou que o Concello coñeceu onte que o Tribunal administrativo de contratación pública de Galiza vén de recibir dous recursos aos pregos administrativos da licitación, que suspende todo o procedemento, agás o prazo de presentación de ofertas, agora tamén suspendido pola Xunta de Goberno.
O concelleiro explicou que o contrato está en licitación dende finais de 2022 e o prazo de presentación de ofertas remataría o vindeiro luns, 30 de xaneiro. Onte chegou ao Concello a notificación do Tribunal no que se fai constar a presentación de dous recursos aos pregos. Un é de Aselip, Asociación nacional de empresas de limpeza pública integrada por FCC, Urbaser, Cespa, SAV (Agricultores de la Vega de Valencia), Valoriza, Grupo empresarial Sadisa, Contenur, Acciona, Ingesan e outro de Moda Re Sociedad cooperativa de iniciativa social.
O Concello reenviará o expediente e unha contestación aos recursos na vindeira semana, e o Tribunal ten un prazo de tres ou catro semanas para emitir a súa resolución.
Raimundo González explicou que o acordo do Concello foi “suspender o prazo de presentación de ofertas porque se trata dun contrato importante, novidoso e de vangarda que persigue novos obxectivos ambientais e o cumprimento da nova lei, polo que é preciso traballar con seguridade xurídica”. De feito, reiterou que “queremos que este expediente vaia a punto de cruz”, polo que non se considera unha mala nova que se tivese recurrido ante o Tribunal.