Desenvolvemento Sostible inicia nestes días os traballos de posta a punto da praia fluvial do Lérez de cara ao verán

40
  • Segundo explica o concelleiro socialista Iván Puentes, “o areal urbano contará con servizo de socorrismo entre o 1 de xullo e o 31 de agosto, tódolos días en horario de 13:00 a 20:30 horas, e con servizo de limpeza dos baños e do contorno da praia neste mesmo período”
  • Ademais de achegar uns 10,5 metros cúbicos de area, o departamento que dirixe Puentes instalará un balizamento perimetral de boias amarelas de 175 metros que sinalará a área permitida para o baño

A Concellería de Desenvolvemento Sostible iniciará nestes días unha serie de traballos destinados a poñer en óptimas condicións de uso de cara ao verán a praia fluvial do Lérez. As obras darán comezo coa achega duns 10,5 metros cúbicos de area por parte da empresa EC Casas, esencialmente para tapar as zonas nas que agroman a malla de protección e un tubo de desaugue, e proseguirán entre mediados e finais de xuño coa instalación dun balizamento perimetral de boias amarelas de 175 metros que sinalará a área permitida para o baño.

En paralelo, o departamento que dirixe o socialista Iván Puentes vén de contratar á firma Salvar, Formar y Socorrer SL para a prestación do servizo de socorrismo entre o 1 de xullo e o 31 de agosto, tódolos días en horario de 13:00 a 20:30 horas. Segundo sinala Iván Puentes, “o areal urbano do Lérez estará vixiado dous socorristas de luns a venres entre as 16:30 e as 20:30 horas e con un o resto do tempo”.

“Durante este mesmo período estival, a empresa Prezero España SAU encargarase do servizo de limpeza dos baños e da praia, así como das zonas verdes lindeiras. Os aseos limparanse dúas veces ao día”, avanza Iván Puentes.

Tal e como se establece na cartelería de Verde Urbano deseñada pola Concellería de Desenvolvemento Sostible, definiranse unhas zonas de baño permitido, con precaución e prohibido (facendo fincapé no perigo das correntes de baixada e subida de marea). Asemade, Puentes lembra que “estamos nunha praia libre de fume e na que a cidadanía debe axudar a conservar un ambiente agradable, falando e escoitando música e radio cun volume baixo e empregando as papeleiras para botar os refugallos”.

O orzamento destinado a este conxunto de contratacións supera os 31.000 euros: 18.053,20 € para o servizo de socorrismo, 5.861,31 para as achegas de area, 5.071,11 para a limpeza dos baños e do areal e 2.238,50 para a instalación do balizamento.