Inicio Blog

Monte Porreiro quere avanzar coñece as melloras proxectadas para o barrio

Vecinos de Monte Porreiro 3
Vecinos de Monte Porreiro 3

O concelleiro Demetrio Gómez reuniuse con representantes desto colectivo veciñal para explicarlles os primeiros datos da reforma das rúas Grecia e Alemaña, e tratar outras demandas como o sostemento urbano, a parada de bus do Luís Seoane ou un posible novo estacionamento para a rúa Reino Unido.

O concelleiro de Obras Urbanas, Demetrio Gómez recibiu esta semana aos representantes da Plataforma Monte Porreiro quere avanzar para informarlles dos datos existentes a día de hoxe sobre o proxecto de reforma integral das rúas Grecia e Alemaña. O Concello está á espera de recibir nestes días o proxecto da reforma, xa que polo de agora existe unhas liñas de traballo.

No encontro fíxose fincapé da necesidade de renovar todos os servizos municipais soterrados xa que se atopan en mal estado, así como de dotar de abastecemento de auga potábel a varios inmobles da rúa Cambria. Tamén se amosou preciso mellorar a calidade urbana en todo este ámbito especialmente no que ten que ver coa seguranza viaria, debido ao aumento do volume de vehículos que usan esta zona como vía de paso sen deterse no barrio. 

Monte Porreiro Quere Avanzar manifestou o seu acordo coa necesidade de gañar espazo para as persoas, pero consideraron un problema a reordenación do tráfico xa que entenden que vai a aumentar o tránsito de vehículos pola rúa Cambria. Ao entender da plataforma, esta rúa non está preparada para soportar esta carga, polo que propoñen manter o actual sentido de circulación.

O concelleiro de Obras comprometeuse a estudar a proposta antes de pór en marcha a execución do proxecto.

No encontro tamén se tratou a necesidade de ofrecer máis información á veciñanza sobre a reforma, polo que o concelleiro adiantou que o seu departamento fixará un calendario a comezos da vindeira semana, en canto se reciba o proxecto da obra. Este calendario incluirá información para cada veciña e veciño, información na web municipal cunha caixa de suxestións e reunións par explicar o proxecto.

Outras demandas

Ademais do proxecto de reforma das rúas Grecia e Alemaña, os representantes de Monte Porreiro quere avanzar expuxeron outras demandas como a necesidade de continuar coas obras de sostemento do espazo público que se están a desenvolver.

Tamén falaron de obras relacionadas coa seguranza viaria como a parada do bus escolar do IES Luís Seoane ou a posibilidade de dotar unha zona de aparcadoiro na rúa Reino Unido.

Lores repasa con Feijóo os proxectos da Xunta en Pontevedra

O alcalde de Pontevedra, Miguel Anxo Fernández Lores mantivo esta semana unha reunión co presidente da Xunta de Galicia, Alberto Núñez Feijóo, na sede administrativa da Xunta en Pontevedra para abordar os asuntos que o Goberno galego ten en marcha na cidade, ou os que están por proxectar.

O alcalde recordoulle ao presidente a importancia de que exista “lealdade institucional e tentar resolver os problemas dos cidadáns, que é a nosa obriga”. De feito, afirmou que a liña de traballo do Concello de Pontevedra é pór sobre a mesa temas con solucións razoables en tempos razoables “sen demandar cousas difíciles de executar”.

Nesta mesma liña se situou o presidente da Xunta quen cualificou o encontro de “cordial” e asegurou que “ambas administracións estamos contentas de como van as cousas na cidade do Lérez”.

A reunión centrouse nos temas recollidos nun dossier previamente enviado dende a Alcaldía de Pontevedra ao presidente da Xunta. Segundo o relatorio do alcalde Lores os asuntos tratados foron:

Variante de Alba, que se atopa na actualidade en exposición pública. A proposta da Xunta non foi a proxectada polo Concello, que agora asume como alternativa viable polo que o alcalde pediu “que se teñan en conta todas as afectacións e que se resolvan o mellor posible, pero se trata dunha obra moi necesaria para Pontevedra”. Ademais o alcalde explicou que é preciso mellorar o paso Camiño de Santiago por esta zona na que existe un verdadeiro problema de seguranza viaria na zona.

O presidente da Xunta indicou que o proxecto terá 2 carrís, estará en licitación no primeiro trimestre de 2019 e terá un custe de 8 millóns de euros. En paralelo construirase unha senda peonil para dar servizo ao Camiño de Santiago. 

A estación intermodal está en marcha. O alcalde pediu que se conte coa opinión dos técnicos municipais á hora de realiza a intervención nos arredores das estacións de bus e tren, especialmente agora cando o Concello reforma a rúa Gorgullón que desemboca fronte a estación de autobús. Fernández Lores agradeceu ao presidente da Xunta que teña apostado por levantar un pequeno tramo do río dos Gafos e propuxo a posibilidade de retirar a cuberta proxectada para unir as estacións de tren e de autobús.

O presidente da Xunta confirmou o investimento de 3,4 millóns para remodelar o exterior das estacións e conectar a de autobuses con Josefina Arruti; así como 2,4 millóns de euros para reformar a propia estación de autobuses.

A senda do Gafos foi outra das peticións do alcalde, que defende a súa continuidade até a parroquia de Tomeza, pasado o nó do Marco. Solicita a colaboración de Augas de Galicia que é a competente na materia, coa posibilidade de que o Concello faga un anteproxecto e, incluso, a senatura dun convenio económico. Lores defende esta tramitación por ser a administración autonómica a que ten máis axilidade nos expedientes.

O presidente da Xunta confirmoulle ao alcalde que ía transmitir a petición á Consellería de Infraestruturas para ver se se pode cofinanciar a senda. Aínda que é unha senda que non está contemplada dentro da rede recollida pola Xunta de Galicia en todo o país, “nos parece proporcionado e axeitado”.

O Gran Montecelo é un dos asuntos capitais da carteira de proxectos. É un proxecto en marcha, totalmente imprescindible e necesaria, en palabras de Fernández Lores, “para que teñamos uns equipamentos sanitarios dignos”.

A Xunta de Galicia aprobará este mes de xullo o Plan Sectorial e sacará a licitación a obra a finais de 2019, para que o novo hospital poida estar en construción en 2020 por un importe que superará os 100 millóns de euros. Unha vez rematado este edificio, a Xunta xa traballa na reforma do actual Montecelo.

O transporte metropolitano e urbano foi outro dous asuntos nos que se chegou a acordo. Tanto o alcalde como o presidente da Xunta acordaron iniciar as conversas para aproveitar a economía a escala do transporte metropolitano e transformalo en urbano ao seu paso pola cidade. Ambas administracións sentaranse a definir as paradas na cidade (o transporte metropolitano de Pontevedra ten que estar adxudicado a final de ano), e o Concello tramitará un transporte a demanda de uso nas parroquias para atender os tráficos que non se poden atender co transporte metropolitano.

A residencia da terceira idade xa existe acordo sobre o terreo da Parda e a Xunta elabora un anteproxecto para a construción dun edificio que, segundo o presidente Feijóo, vaise a licitar “este ano” por uns 10 millóns de euros.

O Pavillón da Parda é un proxecto demorado por parte do Concello (debido a tramitacións administrativas e expropiacións) pero sobre o que segue existindo o compromiso do Xunta para financiar unha parte. O alcalde comprometeuse a que pola mañá terá un uso para o CGTD e pola tarde para os clubs da cidade.

O alcalde tamén lle transmitiu o interese do Concello por recuperar os terreos ocupados polas administracións na Xunqueira da Gándara (Alba), polo tanto, tamén os da Xunta de Galicia. E informoulle da posibilidade de que a Xunta vaia buscando alternativas a eses terreos que agora ocupa.

Sobre a EDAR dos Praceres, o alcalde recordoulle que o gran problema  é o exceso de carga cando se engaden as augas pluviais, que maioritariamente proceden dos concellos de Poio e Marín, e tamén do Porto. “Nós imos seguir eliminando pluviais -aínda que a rede de Pontevedra está completa ao 98%- pero queremos que esa responsabilidade non recaia solo sobre Pontevedra porque nós non producimos ese exceso”.

O presidente da Xunta lembrou que no mes de marzo se licitou a mellora das actuais instalacións cun investimento de 15 millóns de euros, e a continuación farase un novo emisario submarino. Amosouse de acordo en que “a depuradora non se pode colapsar con pluviais, e os concellos que a usan teñen que cumprir con ese compromiso”.

O dragado do Lérez, “necesidade e demanda histórica da cidade”, en palabras de Lores terá solución empregando un dos puntos de verquido habilitado pola administración xeral do Estado para verter os áridos inocuos que se retirarán do Lérez. O alcalde indicou que “Pontevedra non quere facer dano a ningún ecosistema, pero si que quere que se drague a ría”.

Outros temas abordados foron o remate das obras dos novos xulgados que será ao longo deste mes; a mellora da estrada de Vilagarcía; o traslado ou mellora do punto de encontro na cidade; a próxima ampliación da terceira fase do Carlos Oroza; a colaboración no tratamento dos residuos orgánicos; mellora da seguridade viaria en estradas que son competencia da Xunta de Galicia, como a estrada de Campo Lameiro; “ou que a TVG nos trate con máis cariño”, dicía o alcalde de Pontevedra,  Miguel Anxo Fernández Lores quen reclamou unha delegación para a cidade ou ben unha información máis exhaustiva sobre Pontevedra na televisión pública galega.

“Valoro positivamente esta entrevista”, explicou Fernández Lores que recoñeceu que a Xunta pasou por momentos de financiación complicados nos últimos anos, e na última lexislatura cambiou a situación económica e tamén a de colaboración co Concello, cousa que agradecemos que confiamos en que siga nesta senda de cara ao futuro”.

Continúa o zafarrancho de limpeza na avenida de Uruguai

Frank Wittkowski en Pixabay

A Concellaría de limpeza viaria, xestionada por Raimundo González continúa esta semana co zafarrancho de limpeza na avenida do Uruguai no lateral da ría.

Como vén sendo habitual, a limpeza farase na madrugada de mañá. A zona de estacionamento estará valada dende esta tarde prohibindo o aparcamento nas horas anteriores aos traballos. Os vehículos que permanezan estacionados serán retirados polo guindastre municipal.

A limpeza farase con máquinas de varrer e limpadoras de auga a presión tanto na beirarrúa como na beiravía e na calzada, polo que a Concellaría solicita a colaboración de todos os veciños e veciñas e tamén dos condutores para garantir un bo resultado. Ao mesmo tempo, pide desculpas polos inconvenientes que poidan ocasionar estes labores habituais do Concello

A DXT eloxia o traballo feito por Pontevedra á hora de liderar e promover unha mobilidade segura e sostíbel nas cidades

DXT Convención147
O alcalde, Miguel Anxo Fernández Lores, inaugurou a 57ª convención de Directivos da Dirección General de Tráfico cunha conferencia sobre a transformación urbana lograda na Boa Vila 

O alcalde de Pontevedra, Miguel Anxo Fernández Lores, participou esta mañá de mércores no acto inaugural da 57ª convención de Directivos da Dirección General de Tráfico (DGT) que ao longo de varias xornadas, o entre o 29 de novembro e o 1 de decembro, congrega na Boa Vila a todos os directores provinciais do Estado así como a todo o equipo e altos cargos deste organismo.

Ademais da intervención inicial, acompañado da subdelegada do Goberno en Pontevedra, Maica Larriba, e o director xeral de Tráfico, Pere Navarro, o rexedor da cidade ofreceu unha conferencia co obxectivo de aportar unha visión global da transformación urbana realizada na cidade, explicando e definindo os elementos aplicados durante a mesma, como a creación de rúas con plataforma única, os límites de velocidade, a instalación de pasos de peón elevados e demais ferramentas. 

Lores lembrou que a cidade de Pontevedra sempre mantivo unha relación moi cordial, xa que «dentro dos organismos supramunicipais, a DXT sempre nos apoiou, acompañou e axudou no modelo de Pontevedra». Doutra banda, fixo fincapé que esta relación tivo un momento especial a través da persoa de Pere Navarro, director xa na anterior etapa do goberno socialista no Estado, «se ben a relación coa institución sempre foi boa».

O alcalde logrou na súa intervención chamar a atención dos presentes coas medidas tomadas na cidade, vangardistas no seu momento, e emuladas logo co tempo por outras vilas e cidades. Após a conferencia, o rexedor e os edís Eva Vilaverde, Anabel Guías e Demetrio Gómez fixeron de guías polas rúas de Pontevedra para amosar nas mesmas e facer reais e visíbeis todas as ideas lanzadas durante a conferencia.

Pola súa banda, Pere Navarro amosou a súa sorpresa e interese en medidas aplicadas en Pontevedra coma os estacionamentos de servizos co fin de evitar tráficos de axitación innecesarios e negativos para as cidades. «É un tema que non está resolto nas cidades e aquí existe a fórmula para poder parar un intre, para poder deixar a unha persoa. É algo que só está aquí. É unha idea moi potente e creo que pouco a pouco os Concellos avanzarán nesta idea, na de permitirlle ás persoas parar e arrancar nun momento e non en aparcar, pechar o coche e irse», explicou.

«Hai Concellos que cren que ter centros comerciais nas aforas é algo que lles dá prestixio, ese modelo de que sábado e domingo toda a familia vai pasar o día ao centro comercial… Pontevedra tomou unha decisión arriscada e creo que leva á reflexión», sinalou Navarro, así como a ausencia de mortes por violencia viaria na contorna urbana de Pontevedra desde o 2011, «as zonas 30 deron un resultado asombroso en todo o país, pero cando vés aquí xa ves que é así desde hai moitos anos. A nosa presenza quere recoñecer o traballo feito por Pontevedra, e o moito que axudou ao resto de vilas, por ser ese tractor no tema da mobilidade segura e sostíbel nas cidades».

Marcos Rey entrega os diplomas aos 13 alumnos e alumnas participantes no Curso de Operador/a de Carretillas Elevadoras organizado pola Asociación Amicos en colaboración con Ara Formación e a Concellería de Benestar Social

WhatsApp Image 2022 11 30 at 12.19.58 3
  • A actividade formativa enmárcase no Programa Más Empleo de Fundación La Caixa, subvencionado polo Fondo Social Europeo, e estivo dirixida a persoas desempregadas con discapacidade ou en risco de exclusión social

O concelleiro de Benestar Social, Marcos Rey, presidiu esta mañá no centro formativo Ara Formación o acto de entrega de diplomas aos 13 alumnos e alumnas participantes no Curso de Operador/a de Carretillas Elevadoras organizado polo departamento de Orientación, Formación e Emprego da Asociación Amicos, financiado a través do Programa Más Empleo de Fundación La Caixa (con subvención do Fondo Social Europeo da UE). Trátase dun grupo de usuarios e usuarias do colectivo, dedicado á atención e integración de persoas con discapacidade intelectual, autismo, parálise e dano cerebral e ás súas familias, que ao longo das pasadas semanas tiveron ocasión de formarse nun eido que lles abrirá moitas portas no mercado laboral.

Trala entrega dos diplomas, Marcos Rey aproveitou para felicitar desexar un bo Nadal aos beneficiarios da formación, augurando unha entrada de 2023 “que sen dúbida traerá moitas oportunidades de acceso ao traballo”. “Eu mesmo fixen este curso de carretilleiro no seu día e sei perfectamente a enorme demanda que hai neste ámbito”, sinalou o edil do PSOE.


A formación, dirixida a persoas desempregadas con discapacidade ou en risco de exclusión social, tivo unha duración de 24 horas na modalidade mixta, 16 online e 8 presencial. Marcos Rey asegurou que “para o Concello foi un pracer ceder espazos na Casa Azul para contribuír á formación dos que máis o precisan”. Doutra banda, Miguel Beiro, responsable da área de Alianzas e Emprego de Amicos, quixo dar as grazas a todos os participantes, recoñecendo o esforzo realizado e animándoos a ter unha boa actitude de cara ao mundo laboral.
Entre os asistentes ao acto desta mañá atopábanse Marta Besada e Rosa Agrelo, dúas técnicas da asociación Amicos neste programa de Más Empleo, que quixeron agradecer aos participantes o interese e tenacidade ao longo de todo o curso. Asemade, dedicaron unhas palabras de agradecemento ao Concello de Pontevedra pola súa boa predisposición cedendo o espazo no que realizar a formación e permitindo que accións como esta sexan posibles.


Durante o curso, os alumnos participantes recibiron formación teórica en aspectos como a condución en baleiro e con carga; operacións de elevación; utilización de accesorios especiais para unidades de carga determinadas; cargas oscilantes ou con centro de gravidade variable; elevación de persoas; tipos de estantes e sistemas de almacenaxe; mantemento preventivo típico (rodas, niveis…); equipos de protección individual; estacionamento da máquina en aparcadoiro, ou procedementos a seguir no caso de producirse situacións de risco, retención do operador… No que atinxe á parte práctica, os beneficiarios tiveron ocasión de reproducir manobras sen carga, desprazamentos en ámbalas direccións, velocidades, xiros, freadas, utilización en ramplas; manobras semellantes con carga; carga e descarga de camións, colocación e retirada de cargas en estantes, apiñado e retirada de cargas en superficie libre; manobras extraordinarias tales como cargas de dimensións ou características fora do habitual pola súa lonxitude e forma; ou o manexo dunha carga simultánea con dúas carretillas (contidos axustados aos establecidos na Norma UNE 58451:2012, de Formación dos Operadores de Carretillas de Manutención ata 10.000 kg).

O Ganapán convida aos máis pequenos a pasar a fin de semana e a ponte da Constitución no Gastroespazo do Mercado

O Ganapán sábado 3 e domingo 4 de decembro
  • O calendario de actividades prolongarase durante cinco días, nos que a rapazada poderá cociñar receitas de Welsh cakes, torta de mazá, pera e chocolate, brunch con grelos e cogomelos, roliños de chocolate e bombóns de cacahuete e chocolate
  • Haberá obradoiros creativos nos que os nenos e nenas participantes terán ocasión de deseñar libélulas de cores, crocodilos, pulseiras, colares e aneis, arañas de patas longas e complementos de superheroes como Spiderman, Batman ou a Muller Marabilla

Achéganse os festivos da Constitución e a Inmaculada Concepción e O Ganapán, o programa de lecer infantil impulsado pola Concellería de Promoción Económica no Mercado de Abastos, convida á rapazada de 4 a 10 anos a desfrutar desta longa ponte pasándoo en grande no Gastroespazo. O calendario de actividades deseñado para este inicio de decembro prolongarase durante cinco días (sábado 3, domingo 4, luns 5, martes 6 e xoves 8), nos que os máis pequenos poderán cociñar receitas de Welsh cakes, torta de mazá, pera e chocolate, brunch con grelos e cogomelos, roliños de chocolate e bombóns de cacahuete e chocolate.


Ademais, haberá obradoiros creativos nos que os nenos e nenas participantes terán ocasión de deseñar libélulas de cores, crocodilos, pulseiras, colares e aneis, arañas de patas longas e complementos de superheroes como Spiderman, Batman ou a Muller Marabilla. Tal e como lembra a concelleira de Promoción Económica e Turismo, Yoya Blanco, “aqueles rapaces e rapazas que desexen somerxerse nestas xornadas de diversión deberán reservar a súa praza previamente a través do correo electrónico oganapan@gmail.com, indicando na mensaxe as posibles alerxias ou intolerancias”. “Tódolos talleres desenvolveranse en horario de 11:30 a 13:30 horas. Como sempre, recomendo encarecidamente vir cunha friameira para levar a casa a receitas elaboradas”, sinala a edil do PSOE.


O programa dará comezo este sábado 3 cun taller no que os nenos e nenas aprenderán a cociñar os Welsh cakes, unha popular masa galesa que é unha mestura entre galletas, bolos e tortiñas (pero con personalidade propia) e outro no que confeccionarán unhas libélulas de cores moi bonitas. Para o domingo 4 de decembro están previstos un obradoiro no que se elaborará unha torta de mazá, pera e chocolate, moi suave e gorentosa, e outro no que o protagonista será un réptil moi especial: o crocodilo.


O luns 5 de decembro, os pequenos realizarán a choco-versión dos famosos rolos de canela e deseñarán uns súper complementos dos seus heroes e heroínas favoritos, como Spiderman, Batman ou a Muller Marabilla, mentres que o martes 6 poderán papar uns grelos e champiñóns en forma de muffin e elaborar pulseiras, colares e aneis.
A programación proseguirá o xoves 8 de decembro cuns talleres nos que os participantes terán ocasión de preparar unha receita moi especial de bombóns de cacahuete e chocolate e facer unhas arañas de patas longas ben simpáticas.

Pontevedra sumarase este sábado 3 de decembro ao acto reivindicativo polo Día Internacional das Persoas con Discapacidade ‘Baixo o mesmo paraugas’

Catel Praza da Ferrería
  • A iniciativa, que tamén se convocou na Coruña, Ourense e Vigo e que conta coa colaboración da Concellería de Benestar Social, desenvolverase na Praza da Ferrería a partir das 12:00 horas

O concelleiro de Benestar Social, Marcos Rey, participará este sábado 3 de decembro ás 12:00 horas no acto reivindicativo ‘Baixo o mesmo paraugas’, organizado na Praza da Ferrería co gallo do Día Internacional das Persoas con Discapacidade e que se celebrará en paralelo en Pontevedra, A Coruña, Vigo e Ourense. Como en anteriores edicións esta iniciativa, na que participarán máis de 100 asociacións de discapacidade de toda Galicia (entre elas Xoga, Aspace, Down Xuntos, Asearpo, Asseii ou Adicam) e que conta coa colaboración do Concello capitalino e a Deputación Provincial, pretende converterse nunha xornada para reclamar os dereitos das persoas con diversidade funcional, convidando a toda a cidadanía a traer os seus paraugas de cores.

Ademais de na Ferrería, tamén haberá concentracións de paraugas na Praza Maior de Ourense (11:30 horas), na Praza da Estrela de Vigo (12:00 horas) e no Parrote, en Coruña (12:00). Unha acción que, tal e como sinala o socialista Marcos Rey, “irá acompañada ese mesmo día do acendido de diferentes edificios municipais con iluminación de cor verde: a Casa Consistorial de Pontevedra, a Casa Rosada de Poio e o Consistorio de Cangas”. “O acto da Ferrería -matiza o edil do PSOE- contará con servizo de interpretación de lingua de signos a través do programa Comunico, da Concellería de Benestar Social”.

Yoya Blanco: “O Nadal vai tomar as rúas de Pontevedra e vaino facer a partir desta fin de semana”

IMG 20221129 WA0017
  • A concelleira de Promoción Económica e Turismo anuncia o inicio dos traballos para dotar ao Mercado de Abastos “dunha decoración absolutamente espectacular, na que poderemos sacar a primeira foto do Nadal de Pontevedra a partir desta fin de semana”
  • O departamento que dirixe a socialista destina máis de 40.000 euros a engalanar o edificio da rúa Serra cun decorado que estará protagonizado por tres fascinantes peixes artísticos con iluminación interior (un de 2,50 metros de lonxitude e outros dous dun metro) que se instalarán na fachada; tres esferas inchables: unha bola de 80 cm de diámetro, unha de 60 cm e outra de 50 cm; unha burbulla photocall de dous metros de diámetro dotada dunha plataforma cunha mensaxe de Feliz Nadal e o recubrimento das bancadas de peixe cun tecido de veludo fantasía en cor verde

“Á marxe de que son nai, teño fillos pequenos e de que as festas de Nadal teñen carácter sagrado na miña casa, son absolutamente consciente da importancia que estas datas teñen para o comercio e a hostalería locais, e esta campaña, en plena crise de prezos, máis que nunca. O Nadal vai tomar as rúas de Pontevedra e vaino facer a partir desta fin de semana”. Deste xeito anunciou a concelleira de Promoción Económica e Turismo, Yoya Blanco, o inicio dos traballos para dotar ao Mercado de Abastos e ao seu Gastroespazo “dunha decoración absolutamente, na que poderemos sacar a primeira foto do Nadal en Pontevedra, agardamos que a partir deste sábado ou domingo”.


Segundo avanzou a edil do PSOE, o seu departamento tamén ten previsto iniciar nos vindeiros días na Alameda a montaxe das carpas nas que se desenvolverán actividades enmarcadas no programa Ponte Xogos, das que os nenos e nenas poderán desfrutar mediante tíckets de compras realizadas no comercio local. “A idea é instalar diversas carpas con decorados e iluminación de Nadal e actividades divididas en función das idades… Deixaremos unha Alameda fermosa e agardemos que todo estea listo para desfrutar xa para despois da ponte da Constitución”, afirmou Yoya Blanco.


Como vén sendo habitual nos últimos anos, os elementos de decoración e iluminación que comezaron a instalarse no Mercado de Abastos non deixarán indiferentes a ninguén. A Concellería de Promoción Económica volverá confiar nas firmas especializadas Inbloom, Grupo Xesdavi e Begoña Méndez Iribarren para despregar todo un universo de fantasía nas instalacións da rúa Serra, cun orzamento que en conxunto supera os 40.000 euros.


A decoración navideña estará protagonizada por tres fascinantes peixes artísticos con iluminación interior (un de 2,50 metros de lonxitude e outros dous dun metro) que se instalarán na fachada; tres esferas inchables: unha bola de 80 cm de diámetro, unha de 60 cm e outra de 50 cm; unha burbulla photocall de dous metros de diámetro dotada dunha plataforma cunha mensaxe de Feliz Nadal e os logotipos do Mercado e a Concellería de Promoción Económica, e unha composición de burbullas de varios tamaños na fachada.


A intervención de Inbloom incluirá unha montaxe central que combinará bolas de fantasía con bolas verdes de vexetación no Gastroespazo; instalacións laterais de musgo vermello e amaranto nas zonas de acceso; o recubrimento da parte superior das bancadas dos postos de peixe cun tecido de veludo fantasía en cor verde; diversas grilandas con elementos naturais; un arco realizado con elementos vexetais colgantes (para dar sensación de túnel) na entrada principal; a vexetación interior da burbulla photocall e árbores para as ventás da fachada. 
Tal e como subliñou Yoya Blanco, “a iluminación tampouco vai defraudar e contempla a instalación de 15 focos Led W600, 6 bolas de espellos de 50 cm e 5 de 20 cm, un microled icicle no arco de entrada e 6 tiras de bombillas de dous metros”.

O Concello de Pontevedra formará parte do circuíto das Residencias Paraíso de Danza na convocatoria 2023

Carme Fouces e Felix Fernandez


Pontevedra é a primeira cidade da provincia en sumarse a estas residencias das que xa formaban parte os concellos de A Coruña, Santiago, Lugo, a Mostra Internacional de Teatro de Ribadavia, Fundación Cidade da Cultura de Galicia

Esta iniciativa sumada á programación de danza e artes e movemento que terá lugar do 12 ao 16 de abril, segundo avanzou a concelleira Carme Fouces, darán pulo e visibilidade a esta disciplina


A concelleira Carme Fouces presentaba esta mañá a incorporación do Concello de Pontevedra ás Residencias Paraíso  e avanzaba que “haberá danza en abril no Pazo dos 12 o 16. Aínda non podo desvelar a programación que estamos perfilando, pero traeremos o máis importante da danza contemporánea do momento. A nosa intención de organizar un ciclo de danza encaixaba moi ben coas Residencias. Este foi o seu 6º ano e nos entraremos na convocatoria 2023, que será a 7ª e  seremos o primeiro concello da provincia de Pontevedra en sumarnos. É unha aposta por esta arte escénica que precisa de máis pulo e visibilidade porque non hai tanta cultura de ver e entender a danza. En Pontevedra temos un público de teatro que vén educado desde moi novo con ciclos como Núbebes ou Domingos do Principal e chega a adulto con moito percorrido e sendo moi crítico. Hai que facer o mesmo co público de danza, por iso xa vos avanzo que a maoires da incorporación a o proxecto que vos vai presentar Félix Fernández a continuación, a programación de abril traerá demais de espectáculos, encontros e charlas”.

Pola súa banda Félix Fernández, presidente da Asociación Colectivo RPM e Co-coordinador do Programa Residencias Paraíso dirixido por Caterina Valeria, quixo primeiramente agradecer ao concello esta aposta. “As Residencias Paraíso son unha serie de espazos en rede, de norte a sur da nosa comunidade galega que pode celebrarse grazas ao apoio da Axenci Galeda das Inndustrias Culturais AGADIC e a co producción dos Concellos de A Coruña, Santiago, Lugo, Carballo, a Mostra Internacional de Teatro de Ribadavia, Fundación Cidade da Cultura de Galicia na vindeira convocatoria de 2023 , tamén o Concello de Pontevedra. O proceso é que cara principios de ano abramos o prazo de recepción de proxectos – o ano pasado por exemplo saíron 8 – e a partires de aí adoitan traballar sobre dúas ou tres semanas cunha asignación de entre 1000 e 1500€ por proxecto nos diferentes espazos adheridos. Logo ten lugar a apertura do proceso creativo ao público, fanse actividades coa comunidade local deses espazos de acollida. Ás veces é un proxecto acabado e outras. A fraxilidade do proxecto é moi interesante e tamén achegar á xente a como se crean espectáculos.  As Residencias permiten investigar na creación artística con esta cobertura e facilita que se poidan coñecer a danza, as artes vivas do movemento e esta linguaxe, ás veces denostada, por falta de coñecemento”

Fouces rematou a rolda apuntando que este será o primeiro ciclo de danza como tal. Sempre incluímos na programación algo pero isto será unha semana de espectáculos e actividades en torno á danza, combinado con 3 semanas de residencias. É un paso importante cara o apoio desta arte máis descoñecida que penso que vai sorprender á xente que se aproxime. Presentaremos o programa tan pronto estea definido”

Ghub Pontevedra, o novo punto de encontro para todas as comunidades dixitais que existen en Pontevedra

IMG 4973
Alberto Oubiña, durante a presentación do Ghub.
O proxecto, promovido desde a área de Xuventude e Novas Tecnoloxías, busca crear un espazo de promoción e creación de sinerxías entre os creadores de contido dixital que hai na Boa Vila
Está previsto a realización de obradoiros, xuntanzas e reunións físicas para divulgar experiencias xa realizadas e estreitar lazos 

O edil de Xuventude e Novas Tecnoloxías, Alberto Oubiña, presentou esta mañá en rolda de prensa o novo proxecto impulsado desde o Concello de Pontevedra e que leva por nome Pontevedra Ghub. Que é Ghub Pontevedra?Unha proposta e punto de encontro para as comunidades dixitais que existen na Boa Vila, ou que parten da mesma.

«É un proxecto no que levamos traballando desde hai máis dun ano e que agora ve a luz ou, polo menos, conta xa cunha parte visíbel coa que se pode interatuar», explicou Oubiña. «Realizamos un proceso de escoita durante meses para identificar a todos os axentes, ou grande parte deles, que operan en Pontevedra e que traballan no eido dixital e nas súas múltiples capas».

No referido ao nome, o edil de Novas Tecnoloxías quixo lembrar o significado orixinal da palabra Hub, e esa ampliación semántica e retranqueira ao engadirlle o ‘g’ diante, ofrecendo unha ‘gheada’ máis que coñecida no país. 

Así, o Concello mantivo contactos con estas persoas, un xeito de procurar os seus obxectivos, entendelos e comprobar que faltaba na cidade de cara á poder ter unha maior interrelación entre as comunidades dixitais (pero desde o local). «Fixemos e fixémonos unha serie de cuestións: Quen anda aí? Que están a facer? Que pretenden? Cales son as cousas ás que se dedican? Xa sexa profesionalmente ou centrados no ocio».

Deste xeito, Pontevedra Ghub achou xente do mundo dos videoxogos, como a asociación Gaming Troop ou a Fundación Museo do Videoxogo de Galicia (MUVI) que conta con representantes en Pontevedra; artistas especializados no dixital, xente desde ESDEMGA no eido da moda, o deseño web e mesmo influencers, creadoras de contido relacionado coa cidade ou coas súas vidas. Todas estas persoas forman a chamada comunidade dixital pontevedresa que foi atopada nesta busca activa desde o Concello.

«Queremos avanzar e afondar en dúas capas diferentes. Dunha banda, a capa dixital, en base a unha web que estamos a crear e que está en proceso de medrar», indicou. «Doutra banda, hai unha capa física na que as persoas poderán atoparse, coñecerse e estreitar posíbeis lazos a través dunha serie de encontros e un diálogo activo».

Un dos obxectivos do Ghub Pontevedra é a creación dun catálogo público, conectado a través da web, no que as persoas da comunidade dixital poderán coñecerse e expoñerse, tanto entre elas como ao público. 

Afondando na capa presencial, na capa física, o programa de encontros xa está en funcionamento. Onte, 28 de novembro, xa foi realizado un encontro informal no Pazo da Cultura, mais continuará este mércores, 30 de novembro, ás 12 horas, cunha charla da xornalista e directora de Vinte María Yáñez. Ás 17 horas tamén haberá unha sesión práctica. A idea é achegarlle aos asistentes a idea de como chegar até o público galego na Internet, ben collendo a experiencia de Vinte co público mozo. 

O día 2 de decembro, ás 19 horas, tamén está programada outra cita con Marta Verde, artista visual e creadora dixital pontevedresa, colaboradora na actuación das Tanxugueiras no Benidorn Fest, que ofrecerá a súa experiencia na aplicación da arte dixital en propostas ao vivo. O día 3, ás 10 horas, fará un obradoiro de computer vision in comprocressing. Todas estas xuntanzas serán realizadas na sala VIP do Pazo da Cultura.

«Non queremos que isto sexa un proceso explosivo. Queremos ir buscando xente, medrando aos poucos e sumar creadores e protagonistas distintos. É un proxecto a longo prazo, en creación, de escoita activa e de posta de interrelación entre as persoas», finalizou Oubiña.

O alcalde sinala que en Abu Dhabi «quedou constatado» o nome de Pontevedra a nivel mundial dentro do triatlón

IMG 4983
O alcalde, Miguel Anxo Fernández Lores, posa coa bandeira do World Triatlón.
A bandeira da Gran FInal das Series Mundiais xa está no Concello e será colgada no futuro nalgún punto simbólico da cidade para iniciar a conta atrás da gran cita deportiva 

O alcalde de Pontevedra, Miguel Anxo Fernández Lores, fixo esta mañá un balance da viaxe realizada até Abu Dhabi co fin de participar no acto institucional da entrega de bandeira que fai que a Boa Vila sexa sede da Gran Final das Series Mundiais de Triatlón, e nas diferentes reunións de traballo e seguimento realizadas pola comisión organizadora do evento.

«Constatamos que Pontevedra é un referente no triatlón a nivel mundial no referido a eventos deportivos neste eido», explicou o rexedor. «Somos a cidade que máis eventos ten realizado de todas as categorías: mundiais, europeos, nacionais, multideporte, duatlón… Hai unha clara avidez de todos os practicantes cos que falamos por vir no 2023 até Pontevedra».

Lores sinalou que todos os directos deportivos lle ofreceran os seus parabéns, así como os presidentes das federacións e dos deportistas cos que mantivo contacto. «Todo o mundo  co que falamos confirmou o obxectivo de estar na cidade o ano que vén. Saben que vai ser a mellor proba da historia dentro desta disciplina. Estamos motivados e listos para facelo posíbel. Os mellores competidores deste deporte van estar aquí, pois é a última proba importante antes das Olimpíadas».

«A imaxe de Pontevedra como organizadora dun Campionato do Mundo está conseguida e agora toca promover un valor engadido, todo o relacionado cos eventos paralelos á proba, na procura dunha experiencia diferente e máis completa. Queremos que a xente veña antes ou eu que quede para coñecer as Rías Baixas, para gozar de Pontevedra e de Galiza», lembrou o alcalde. «Faremos paquetes turísticos, achegaremos a nosa gastronomía e facilitaremos que todas estas persoas, que serán entre 12.000 e 15.000 coñezan o Camiño de Santiago, os nosos tesouros etnográficos ou as rutas do viño da zona, ou o parque natural das Illas Atlánticas».

Doutra banda, o rexedor afirmou que a bandeira recollida en Abu Dhabi será posta á vista da cidade de Pontevedra co fin de simbolizar a conta atrás que comeza xa para esta cita deportiva, social e cultural. 

Conclúe a primeira fase da implantación da compostaxe individual no rural pontevedrés

O 70% das vivendas das parroquias teñen un composteiro municipal, máis de 4.000 domicilios.

O Concello reservarase 1.500 composteiros máis para novas vivendas, reposicións… e rescindirá o contrato e entregará o stock á empresa adxudicataria.

A Xunta de Goberno acepta a cesión de parcelas en Salcedo e Ponte Sampaio para executar o campo de fútbol de Salcedo e unha vía en Acevedo.

Confírmase o incremento do 3,5% para os funcionarios municipais, ao aplicar o 1,5% con carácter retroactivo dende xaneiro de 2022. 

A Concellaría de xestión dos residuos urbanos, que dirixe Raimundo González, dá por rematada a primeira fase de implantación da compostaxe individual no rural pontevedrés dunha maneira moi exitosa. A día de hoxe o 70% das vivendas habitadas no rural teñen un composteiro facilitado polo Concello, é dicir, 2/3 das viviendas, máis de 4.000 domicilios.

A Xunta de Goberno Local a proposta da Concellaría acorda a rescisión do contrato de subministro dos composteiros individuais que fora de 8.000 composteiros. Reserva uns 1.500 para ofrecer ás novas vivendas que se constrúan ou rehabiliten, para reposicións, e devolverá o stock restante á empresa adxudicataria.

A Compostaxe individual é unha das tres patas da compostaxe municipal, unha aposta decidida do Goberno Local por implantala en todo o Concello e pioneira en Galiza.. Este sistema verase reflectido no vindeiro contrato de xestión dos recursos municipais.

Cesións de parcelas en Salcedo e Ponte Sampaio

A Xunta de Goberno Local tamén informou esta mañá da aceptación da cesión dunha parcela de 3.900 m2 propiedade da Comunidade de montes de Salcedo, para iniciar o proxecto de reforzo de enerxía eléctrica que permitirá a construción do campo de fútbol de Salcedo.

Este proxecto de reforma de enerxía eléctrica ten un custe de 32.248,4 euros.

Tamén a Xunta de Goberno aprobou a cesión de cinco parcelas propiedade doutros tantos titulares, situadas no lugar de Acebedo (Ponte Sampaio) cunha superficie total de 817 m2 para poder executar unha vía parelela ao Paredón que permita unha mellor conservación deste ben etnográfico do rural.

Incremento dos soldos públicos até o 3,5%

A Xunta de Goberno tamén recolleu hoxe a proposta do incremento do 1.5% dos salarios aos traballadores e traballadoras municipais, completando o máximo do 3,5% que autorizaba o Goberno do Estado de incremento das masas salariais dos empregados públicos.

Este incremento supón para as arcas municipais máis de 269.000 euros entre os meses de xaneiro e outubro, xa que o incremento do 1,5% aplicarase con carácter retroactivo. Esta contía pagarase en concepto de productividade a final de ano, ao que se lle sumarán os meses de novembro e decembro que non están incluídos naquela cifra. 

O TEMPO

Pontevedra, ES
overcast clouds
12.6 ° C
13.3 °
11.7 °
92 %
2kmh
100 %
Mér
12 °
Xov
15 °
Ven
14 °
Sáb
12 °
Dom
11 °