Xoga coas manciñas
A Concellalía de Benestar Social, dirixida por Marcos Rey no seu interese por superar as limitacións invisibilizadas que cada día se impoñen ás persoas con diversidade sensorial e buscando a accesibilidade, a inclusión e a comunicación sen límites, presenta o programa MANCIÑAS 20VENTE-20VENTE que ten como finalidade a sensibilización cara ao coñecemento da Lingua de Signos e á comunicación coa poboación xorda, con perda auditiva e xordocega, na poboación de 3º e 4º de primaria dos Colexios de Educación Primaria e o Conservatorio Profesional de Música “Manuel Quiroga” de Pontevedra.
Contamos coa colaboración de XOGA, entidade de iniciativa social, sen ánimo de lucro que defende os dereitos fundamentais, a calidade de vida e o benestar das persoas con diversidade sensorial mediante a oferta de servizos e actividades inclusivas para persoas con diversidade sensorial e que forma parte da Federación Española de Sordoceguera (FESOCE) e coa colaboración de Nelson Quinteiro que interpreta o tema ‘Nun Bou’, pertencente ao quinto clip do disco ‘Músicas de Domingo”, xunto co pianista Brais González.