Beatriz Maceda Abeleira gaña o II Premio María Victoria Moreno

47
  • O certame está convocado polo Concello de Pontevedra e Urco Editora
  • A obra de narrativa, escollida de entre 17 pezas, será publicada pola editorial e a súa escritora obterá unha dotación de 4.000€
  • O xurado destacou da mesma a empatía co seu público potencial: o lectorado que está nos primeiros anos de adolescencia

A última hora tarde de onte tivo lugar a deliberación do xurado do II Premio María Victoria Moreno, composto por Eli Ríos en representación da familia de María Victoria Moreno, Antonio Sambade Caamaño , alumno do IES Torrente Ballester, Anxos Rial en representación do Concello de Pontevedra, Antonio Manuel Fraga, gañador da edición anterior, Andrea Jamardo Seijo en representación de Urco Editorae David Cortizo Conde, de Urco Editora, que actuou como secretario.

A obra gañadora, presentada baixo o título de ‘Ardora’ foi seleccionada por maioría entre as 17 pezas nas que a narrativa e a fantasía foron os xéneros predominantes, non habendo ningunha representación – como si houbo o ano pasado – de poesía ou teatro.

Unha vez aberta a pica, a autora resultou ser Beatriz Maceda, escritora galega que conta entre a súa bibliografía con títulos como ‘Cando John Lennon coñeceu a Valle Inclán’ ou ‘Man. O alemán de Camelle’. Recibirá unha dotación económica de 4.000€ por parte do Concello de Pontevedra e a súa obra será publicada por Urco Editora.

O xurado destacou da mesma o seu “compromiso co ecoloxismo e coas novas formas de convivencia, a construción duns personaxes secundarios de gran relevancia, o emprego responsábel das novas tecnoloxías e sobre todo salienta a empatía co seu público potencial: o lectorado que está nos primeiros anos da adolescencia.”

COMPARTIR