A cidade empeza a iluminarse para o Nadal

20 Novembro, 2020
Festas, Novas

A Concellaría de Festas, que dirixe Carme da Silva iniciou nestes días a colocación do alumeado de Nadal en distintas rúas da cidade. Hoxe mesmo, en Michelena.
Entre as novidades da decoración de Nadal está prevista a instalación dunha campá en Barcelos, bolas na praza do Hospital e en Monte Porreiro, ou mantos de luz nas prazas de Méndez Núñez e da Leña.
Por vez primeira, máis de 80 rúas da cidade terán iluminación de Nadal.

A Concellaría de Festas iniciou nestes días a colocación do alumeado de Nadal en distintas rúas da cidade para que estea listo o vindeiro venres, 4 de decembro, cando está previsto que se poña en marcha. A pesar de que Pontevedra vive momentos tristes pola situación da pandemia, a concelleira Carme da Silva quere que a iluminación de Nadal, ao igual que todos os anos, mellore o ánimo dos veciños e veciñas de cara a estas festas tan familiares e entrañables.

A Concellaría redobrou esforzos para que a cidade ofreza a súa mellor imaxe tanto colocando arcos, iluminando farois e arborado e instalando elementos decorativos de Nadal en 81 rúas e prazas da cidade, incluso en zonas que até o de agora non dispoñían de ningún destes elementos.

A día de hoxe xa está instalada toda a iluminación do centro histórico, para a cal a concellaría conta coa colaboración do Centro Comercial Urbano Zona Monumental, e tamén está colocada noutras rúas como Josefina Arruti ou María Victoria Moreno. Hoxe comezou a instalación no centro da cidade, como na rúa Michelena.

Ademais da instalación de arcos e da iluminación de farois, a decoración de Nadal deste ano terá elementos coñecidos e algunha novidade.

Está prevista a colocación de 8 paneis de felicitación de festas nas entradas á cidade, a instalación dunha árbore artificial da Ferraría de 20 metros e a iluminación das camelias da praza de Ourense. Tamén no centro histórico está prevista a instalación dunha árbore artificial de 10 metros na praza de Méndez Núñez, así como a iluminación do Teatro Principal, do Pazo da Cultura, da Casa Consistorial e do edificio administrativo do Concello, Michelena, 30. Tamén se volverán a iluminar as árbores da praza de San Xosé e a árbore do cruzamento das rúas Uxío Novoneira, Eduardo Pondal, Gorgullón e Xermán Adrio Sobrino. Á praza da Audiencia e a Daniel de la Sota volverán as bolas xigantes de Nadal.

As novidades

Tamén están previstas as seguintes novidades: a instalación dunha campá de grandes dimensións na praza de Barcelos, a colocación de dúas bolas de Nadal máis ás habituais: unha na praza do Hospital e outra no barrio de Monte Porreiro.

Á Parda levarase unha árbore de Nadal e as prazas da Leña e de Méndez Núñez terán un manto de luz.

Unha das grandes novidades desta edición será a iluminación da gran árbore que preside a entrada á Alameda, situada á esquerda da estatua dos Heroes de Ponte Sampaio.

As rúas e prazas

Nesta ocasión a Concellaría decorará 81 rúas da cidade entre arcos e motivos de iluminación nos farois. As rúas e prazas son: