- Ponse en marcha cada vez que as temperaturas baixan de 1ºC e atende tanto a zonas urbanas como a viais das parroquias
A Concellaría de limpeza viaria, xestionada polo concelleiro Raimundo González, vén de activar o operativo por xeadas tanto na zona urbana como en puntos das parroquias do rural. Este operativo, que se activa cada vez que as temperaturas baixan de 1ºC, púxose en marcha a comezos da semana e continuará activo mentres se mateñan as baixas temperaturas.
Neste operativo participan 4 operarios da empresa adxudicataria de limpeza, Ferrovial, que se ocupan de esperexer sal tanto en determinadas rúas urbanas, pasarelas, cruzamentos e viais rurais, como de atender ás chamadas da veciñanza que alertan de puntos que presentan algún perigo por xeada, tanto para peóns como para vehículos.
Así, nas noites de onte e antonte esparexeuse sal en zonas céntricas da cidade como a praza da Ferraría, así como en espazos da contorna próxima ao río como a ponte de Santiago, a pasarela metálica da avenida Bos Aires, ou as pasarelas de madeira da Illa das Esculturas. Tamén se prestou especial atención a toda a contorna de Beiramar e a puntos como o Centro de Saúde da Parda e a pasarela en Doce de Novembro.
No ámbito rural, esparexeuse sal en lugares como Cons, na parroquia de Mourente, en Quinteiro na parroquia de Bora, ou nos lugares de O Vilar, O Rañadoiro e Acevedo en Ponte Sampaio. Tamén se revisaron cruzamentos de pistas que puidesen presentar problemas por xeada.