O Concello e Asociación Galega de Deseño colaboran na renovación da imaxe corporativa municipal

17
  • Membros desta asociación sectorial fixeron achegas á redacción das bases da convocatoria, e participarán no proceso de selección formando parte do xurado 
  • A previsión do Concello é que as bases definitivas se publiquen nos vindeiros días, tras introducir pequenos axustes técnicos

A Asociación Galega de Deseño (DAG), que agrupa aos deseñadores gráficos e industriais de toda Galiza, participará no proceso de renovación da imaxe corporativa municipal. Anunciouno esta mañá a portavoz do Goberno, Anabel Gulías, quen asegurou que espera manter a colaboración coa DAG de cara a futuras convocatorias e contratacións “nas que nos poidan axudar a buscar eses criterios técnicos que definen mellor os concursos públicos en materia de creatividade”.

Anabel Gulías explicou que foi a propia DAG a que se puxo en contacto co Concello para felicitalo pola convocatoria para a renovación da imaxe corporativa e para propoñer algunhas achegas técnicas ao borrador que a portavoz fixera público hai dúas semanas.  Desde ese primeiro contacto, segundo informou Anabel Gulías “afináronse aínda máis algúns criterios técnicos” e incluíronse algunhas modificacións, entre as que citou a composición do xurado avaliador das propostas, e que incluirá dous membros da DAG. A previsión do Concello é que as bases definitivas se publiquen nos vindeiros días, tras introducir estes axustes técnicos. 

Anabel Gulías lembrou que o principal obxectivo da renovación da imaxe corporativa do Concello é reflectir a actual Pontevedra creativa e de vangarda, substituíndo o logotipo que se vén usando desde fai preto de 20 anos, e que é unha adaptación do escudo oficial da cidade.