Pontevedra prepárase para voar polos aires este sábado coa V edición de Saltar na Rúa

• A Ponte do Burgo volverá ser escenario o día 28 a partir das 19:30 horas do espectacular evento organizado pola Sociedade Ximnástica en colaboración coa Concellería de Deportes
• Participarán saltadores de primeiro nivel como David Ferrer, Lucía Sánchez, Alfonso Palomares, Alba Cuns, Gerson Vidal, Lola Bouza e Lisa Vosberg, en probas de lonxitude, triplo e pértega

Os mellores saltadores galegos do momento xa están preparados para voar polos aires na espectacular exhibición que ofrecerá un ano máis na nosa cidade o programa Saltar na Rúa, organizado pola Sociedade Ximnástica de Pontevedra en colaboración coa Concellería de Deportes. O evento, que este verán celebra xa a súa V edición e que inicialmente acollía a Praza da Ferrería, volverá desenvolverse o vindeiro sábado 28 de agosto a partir das 19:30 horas, coa finalidade de evitar posibles aglomeracións, nun escenario tan privilexiado como pouco habitual para a práctica deportiva: a Ponte do Burgo, que albergará por segundo ano consecutivo probas de salto de lonxitude, triplo salto e salto con pértega.

O programa deste Saltar na Rúa 2021 foi presentado hoxe na Sala de Prensa do Teatro Principal polo director técnico da Sociedade Ximnástica, Santi Ferrer, e mailo tenente de alcalde e concelleiro de Deportes, Tino Fernández, quen destacou “a importancia de que o atletismo saia ás rúas de Pontevedra nunha iniciativa protagonizada por atletas de primeiro nivel que, en datas inusuais no que atinxe ao calendario de competición, xa que a tempada finalizou no mes de xullo, veñen a dar o mellor dos espectáculos na ponte máis antiga da capital do Lérez”. “Trátase dun evento que leva camiño de converterse nun ‘clásico’, pois este é o quinto ano consecutivo en que se celebra, a pesar das restricións e dificultades loxísticas que impuxo esta pandemia. A xente que se achegue á Ponte do Burgo nese día tan marabilloso, xa que é San Agustín, pode estar moi tranquila, que vai desfrutar dun espectáculo con toda a seguridade. Só lles pedimos que poñan da súa parte”, subliñou o edil do PSOE.

Para Fernández, esta iniciativa é “un auténtico espectáculo” que “permite visibilizar o deporte” nun momento fundamental, posto que “recuperar a rúa para facer deporte é un xeito de ir retomando pouco a pouco esa normalidade que tanto precisamos”. En opinión do tenente de alcalde, este evento foi posible porque “a organización corre a cargo dun garante como a Sociedade Ximnástica de Pontevedra, un referente na nosa cidade que non deixa de traballar para o deporte e a súa promoción, a través das súas escolas de atletismo, grupos de adestramento e equipos que participan nas ligas nacionais en pista, así como no impulso doutros eventos deportivos tradicionais como o Medio Maratón e a emblemática carreira de Fin de Ano, a San Silvestre”. 

Tal e como apuntou o concelleiro de Deportes, “Saltar na Rúa é outro exemplo máis desa organización e dinamización exemplares, que conta cunha acollida extraordinaria entre a cidadanía e que xa forma parte dese calendario de citas imprescindibles de Pontevedra”.

Campións galegos e de España

Segundo explicou Santi Ferrer, o evento dará comezo ás 19:30 horas coa exhibición de salto de lonxitude, mentres que as de triplo salto e salto con pértega terán lugar a partir das 20:00 e as 20:30 horas respectivamente. Entre os protagonistas destacados desta edición, o adestrador e atleta da Ximnástica destacou os seguintes nomes: “en lonxitude estarán David Ferrer (pertencente ao club pontevedrés), actual campión galego absoluto, e Lucía Sánchez del Valle (Escola Atlética Lucense), campioa de España de probas combinadas en categoría sub 18; en triplo, Alfonso Palomares (Sociedade Ximnástica de Pontevedra), récord galego absoluto e campión de España absoluto en 2016, e Alba Cuns (Playas de Castellón), campioa de España sub 18 en pista cuberta, e en salto con pértega, Gerson Vidal (Atletismo Narón), atleta internacional venezolano de probas combinadas que ten unha marca de 4,90 metros, Lola Bouza (Adas O Barco), campioa galega absoluta, e Lisa Vosberg (Ava Vigo), bronce no Campionato de España sub16”.

Ferrer asegurou que o obxectivo desta iniciativa, “que se converteu xa nunha tradición da última fin de semana de agosto”,  é “sacar o atletismo das pistas ás rúas de Pontevedra, para que a xente poida desfrutar dun espectáculo aínda bastante descoñecido para moit@s”, servindo de escaparate aos atletas máis destacados dun club como a Ximnástica, “que traballa moito o sector de saltos”.